各位媽媽，每次見到小朋友做到啲嘢，你係咪都會衝口而出講：「嘩！BB 你好叻呀！」、「好聰明呀！」？以為狂讚就可以建立自信，點知小朋友大個咗反而變成「玻璃心」，一遇到困難就放棄，或者好在意別人眼光？其實，稱讚都要有技巧！讚錯重點，隨時變成壓力；讚對方向，先可以真正養出強大嘅內在自信！即刻睇下以下 5 個日常情境，教你點樣「換句說話講」！
-1200x1598.webp)
家長常犯5個日常情境
1.少讚「聽話」多肯定「有想法」
戒講：「好乖啊！有聽媽媽話～」
成日讚「乖」，BB 會為咗迎合大人，慢慢就會唔敢表達自己。
改講：「你有自己嘅想法，仲表達到出嚟，好好！」
鼓勵佢哋獨立思考，將來先唔會變成盲目附和嘅「討好型人格」。
2.少讚「比別人叻」 多肯定「自己的進步」
戒講：「你好叻呀，贏晒全班！」
贏輸唔係一切！下下講排名，小朋友嘅專注力只會放在「點樣贏人」，輸咗就會好大挫敗感。
改講：「你睇，你比上次進步咗喎！」
將焦點拉回自己身上，只要今日嘅自己贏過昨日嘅自己，已經好值得鼓勵！
-1200x1500.webp)
3.少讚「聰明」多肯定「努力與堅持」
戒講：「你好聰明啊，咁快就識！」
被讚慣聰明嘅小朋友，日後遇到難題就會好怕失敗，驚俾人覺得自己「變蠢」。
改講：「你啱啱試咗好多次都冇放棄，媽媽好欣賞！」
等佢知道「努力同堅持」先係最寶貴嘅武器，遇到困難先夠膽換個方法再試過！
4.少讚「真懂事」多肯定「敢表達」
戒講：「你好懂事，冇大吵大鬧！」
如果「懂事」＝「唔添麻煩」，小朋友只會將所有委屈同情緒硬吞落肚。
改講：「多謝你願意話俾媽媽知你真實嘅想法！」
俾仔女知道屋企係一個安全嘅避風港，任何情緒都可以講出嚟，再一齊學習用適當方式表達。
5.少讚「完美」多肯定「願意調整」
戒講：「好叻，做得超完美！」
下下要求100分，小朋友會背負「絕對不能出錯」嘅巨大壓力。
改講：「雖然頭先遇到困難，但你嘗試調整方法，最後都搞得掂！」
接納不完美！跌跌撞撞再爬起身，識得「轉彎」解決問題，先係真正嘅人生贏家！