戒片方法｜新手媽媽分享：不迫不駡 說故事誘戒片

替BB戒片是每個媽媽必經的階段，有人說得很輕易。

而我一直抱住順其自然嘅態度，聽不少身邊媽媽朋友講：「不用急，一返學，學校好快幫佢戒到㗎喇。」

話唔心急就是騙人的，仔仔入讀 PN 超過半年，都仲未識同我講要去 VV 或 PouPou，都快三歲了，我開始認真地尋找方法。

先說說我們的背景，好讓各家長了解我的情況。因工作關係，直到仔仔18個月大，我先正式接佢返屋企揍，之前一直都是老人家幫手，老人家好心急，一早買咗個小坐厠迫佢學 VV，但當時仔仔十分抗拒，抱佢坐上去，佢就大叫，後來又買了小坐厠板俾佢試，點知都係失敗，老人家迫多佢兩迫，一除佢條褲仔，佢就大叫，有時仲扭計喊㖭。

好明顯，仔仔不受這一套，是迫不成的。

跟住老人家又買了戒片褲俾佢，又或直頭唔俾佢著片，等佢瀨咗之後醜佢，笑佢，點知仔仔又唔受這一招，又扭計，只會繼續瀨濕。這樣又告失敗。

辭工後，我全職揍仔，相處多了，改用自己的方法，我喜歡跟他說故事，說道理，好似幫佢洗腦咁，日日在他耳邊說。不駡也不迫，等到天氣熱了，今個夏天，終於成功替仔仔戒片了！

戒片要準備的當然是小坐厠或小朋友專用的坐厠板，仲有褲仔設計的紙尿片，方便除片及穿著。

戒片第 1 步：言語暗示、預告戒片

我不時會同仔仔講：

「你快三歲，不再是 BB，已是哥哥了！」（因為我肚裡的 BB 快要出世了）

「只有 BB 先用片片㗎 ……」

「你睇吓爸爸媽咪都冇用片片，會自己去厠所 VV 同 Pou Pou。」

戒片第 2 步：入手 Potty Book 用圖書說戒片故事

買了一本 Potty Book，久唔久當睡前故事，同佢一齊睇呢本書。

我的秘密武器就係呢本《The Potty Book for boys》 !

入面的內容都是圍繞著小男孩如何學會自己上厠所，圖畫精美，文字簡單直接。

我沒時間去書店買書，咁啱去開www.amazon.com買嘢，買夠US$25免郵費，還有很多有關potty的書選擇，各位可以慢慢揀。又或各位可直接往本地的書店，想買英文的，相信誠品或Page One會有唔少這類英文書選擇。

戒片第 3 步：運用圖書角色，用讚美與鼓勵推動戒片

到實踐了，放學回來，就同佢除走尿片，只著褲，叫佢試下想去 VV 或 Pou Pou 時記住同媽咪講呀。頭一兩次都真係會企咗喺度瀨濕晒，但我冇立即責備佢，仲好溫柔咁同佢講，「呵，你 VV 咗，褲仔同地下濕晒喇，唔緊要啦，下次記住同媽咪講，好似Hanry 哥哥（故事書中男孩的名字）咁，use his own potty。Jacob, you can do it!」試多幾日，佢真係會識得同我講，而且每次成功在厠所內 VV 同 Pou Pou，我都會讚佢，佢自己都會好開心咁拍手及沖厠，仲同我講：「Mami，I can do it!」

戒片初部成功，但晚上瞓覺同出街都仲未戒到，我會繼續努力。到時再同大家分享啦。

平日在家唔著尿片，係時候同佢著返條底褲仔，最近在馬莎買了1pack7條的純棉底褲 ($199)，質地好兼有仔仔至愛嘅恐龍圖案，值得推介，大家去開不妨留意吓。