advertisement

如果要我諗一樣我覺得做媽媽以來,唔太稱職嘅事,又或者叫有點覺得對唔住兩個仔嘅事,我會話係廚藝。睇左我10年嘅網友,我知大家係好欣慰的,見到我由初初果碟肚痾蔥爆牛肉,到今日輕易三餸開飯。那是為勢所迫,咁多年變得熟能生巧,我自己知自己事啦,最討厭煮飯!

 

有時見到朋友屋企好好餸,人地啲媽咪識整好多嘢食,家常小菜,甜品又焗蛋糕,我都會有啲戥兩個仔慘,有點內疚,跟著我冇咩口福。每日都係唔同嘅菜炒雞柳、煎雞排豬排、煎三文魚煎魚餃、炒菜炒蛋、豉油雞脾、煎豆腐,間中焗飯焗意粉,食足咁多年,我都要感謝佢三父子毫無怨言,可能知道怨都冇用。其實我咁討厭入廚,可以令我堅持到今日嘅,就係佢地嘅健康吧!

 

呔媽專欄|煮飯這事兒

蔬果炒雞柳

 

呔媽專欄|煮飯這事兒

多菜少肉少調味,最緊要健康行先!

 

呔媽專欄|煮飯這事兒

 

西蘭花、三文魚都係經常出現嘅健康食材。

 

 

老公知我唔鍾意煮飯,好多時都放生我,話出街食,但 weekend 已經食街,平日就食多啲屋企飯,係唔精彩但至少健康,冇味精冇其他加工調味,少油少鹽。偶爾啲仔話鍾意我煮嘅飯,我感動㗎!幾唔好食都係媽媽嘅心機,媽媽嘅愛,係大個時回想起「媽媽嘅味道」。

 

由佢地 BB 時,大約 6 個月大開始食固體,就係我煮飯生涯嘅開始。當年就係一個字「蒸」,所有菜肉魚,都係蒸熟然後搣爛,再撈落爛飯。由於蔬菜本身多汁又好味,我落好多菜,一直都冇加油鹽,原味已好足夠。然後到大啲,3歲左右,煮飯就會多咗少少汁類,好似粟米汁,茄汁,少少蠔油等調下味,因為佢哋開始返幼稚園,響學校食 Lunch 阿姨煮飯好好味,果時我都開始加少少味,唔係餐餐白烚真係好難入口。漸漸長大,我煮嘅嘢都多元化咗,味道可以濃少少(但都淡口過出街食的),可以加啲日本咖喱,可以加蒜蓉,韓式燒烤醬等,咁就開始正常煮飯,煮到依家喇。

 

其實自豪㗎!做媽媽為自己嘅小朋友努力,識英雄重英雄,我更加欣賞肯為小朋友付出嘅媽媽們。老實講,唔係人人會專登煮開畀佢哋食,好多小朋友細細個就跟大人食啲好鹹好濃味嘅飯餸,對身體當然冇咁好。所以好多時小朋友食慣重味,一淡口啲就唔食,啲水冇味又話唔飲,唔食生果唔食菜,其實都關由細飲食習慣事。我希望佢哋盡量食耐啲屋企飯,第時好多機會同朋友出街食,到時未必成日返屋企了。

 

希望幫佢地打好個底,至少呢10幾廿年都清清地,冇咁多化學嘢,大個少啲健康問題出現,呢個都算係我願意為仔煮飯嘅堅持,哈哈!