advertisement

早幾個月,呔仔同細細響診所驗眼時,發現呔仔有近視,而細細仲話係弱視添,哇,幾難接受呀!

心諗,唔係掛? 佢地已經係原始人唔用i-Pad i-Phone之類野,最多都係睇下電視,都咁快有近視架咩? 係呀,我地出街去食飯,等位之類,都係帶飛機車仔玩,又或者係帶故事書出去睇。有時飯後唔想佢地嘈住大人傾計,會比佢地睇陣YouTube打發佢地,但都唔係經常。

至於話細細有弱視,我仲灰,唉。事關我細個就係有弱視,好似叫Lazy Eye,即係天生係2眼唔balance,一邊係有近視,另一邊正常。

好煩架,要做治療,蓋住好果邊眼,逼差果邊眼用多D,否則會靠晒好果邊眼睇野,差果邊會愈來愈懶,慢慢會失明添架!(所以我成日叫大家捐獻「奧比斯」因為眼疾,甚至變盲,個世界漆黑一片真係好慘!)

我一聽到細細話有弱視已經晴天霹靂!唔通又遺傳左? BB時佢有濕疹,之後呔仔又話有哮喘,已經係遺傳晒我地D衰野架喇,仲黎? 作為父母真係內疚非常……

佢地既情況,醫生就建議轉介佢地去眼專科驗清楚。而我亦慢慢接受事實,諗下比起好多人,已經係好幸運!又唔係咩大病,最多咪戴眼鏡…(下刪數百字安慰自己^^)

琴日去左眼專科驗眼,初時有姑娘幫忙check視力、色盲等~

1

2

驗完呔仔,話呔仔既視力係20/20,係最好既Level喎! 其他野都正常,無問題!可能係佢響診所時無心做test,所以亂答掛?

之後到細細。佢未識晒英文字,要用方向果種測試。隻傻豬以為叫佢擺超人Pose,隻手跟住方向上下左右咁擺,又定晒型。非常爆笑!

驗完話細細2眼好balance (呢樣最重要!) 同埋視力都有20/30,響呢個年紀係好好,因眼球仲發育緊。

聽到姑娘咁講,幾開心呀!真係一天都光晒!之後幫佢地滴眼水,放大瞳孔等醫生驗眼。

唔知係咪滴完眼水雙眼視線糢糊,加上間房又黑蚊蚊,都未等到醫生黎,呔仔頂唔順瞓鬼左!哈~ @@

細細驗眼中

3

之後到呔仔驗。我抱住佢,任醫生魚肉。醫生話:「He might wake up pretty soon…」

嘿!佢梗係唔知呔細既絕技係瞓覺,你點攪佢都唔醒架!

結果真係你有你擘佢對眼,佢繼續瞓到返屋企!哈~

4

5