advertisement

大家有無發現,小朋友無論做完左D咩,都好鐘意叫你望佢,會興高采烈咁展示比你睇佢「完成」左一件事,縱使果件只係好小好小既事。又或者有D小朋友,會好似我兩個仔咁樣,會一邊做一邊吼住你有無望佢,非常之鐘意你響佢既世界入面,就會覺得好安全、好安心。由未識講野開始,自己爬,自己行第一步,自己食飯,自己刷牙,直到大個喇識自己沖涼,我地總會響小朋友身邊,一直鼓勵,陪佢分享佢地每個第一次。而佢地亦都因為有我地響身邊支持,變得愈來愈堅強,愈有信心去接受更多挑戰!

shutterstock_419185651

好多人會話,想小朋友快D獨立,唔好成日痴住晒,最好咩都自己搞掂,要放手放手同埋…放手!但我反而覺得,呢樣野要因應小朋友年紀同性格去調節,夾硬放手,對小朋友未必係好事,更可能係一種傷害。好似之前講話大仔太痴我,要慢慢訓練佢更加獨立,可以自己向外探索多D,唔使下下拉住我。講緊既唔係佢行為上,佢平常自理無問題,係講緊心靈上,佢比較敏感同缺乏安全感,咩都驚餐飽,夾硬放手只會令佢更驚恐。而其實當佢身處響安全舒服既環境下,佢自然會有信心去面對挑戰。返左小學之後,佢明顯有好大轉變,同同學相處方面開朗左好多,識好多朋友,無再自己同自己玩手指。之前幼稚園果兩年,幾乎人地行埋D佢就會自動彈開,小息都好少會圍埋同學玩。到上左小學,發現佢合群左,而自我保護能力相對提高,好明顯開始正常地投入呢個小社會。結果我擔心佢會難適應新環境新同學呢D,原來隨住年紀成長,都唔再係問題了。

shutterstock_430567891

shutterstock_302861252

既然每樣野都會有個時候,我地做父母既又使咩咁快要推走佢地呢? 趁仲有機會,佢地仲肯同我地分享每個快樂,不如好好珍惜,用心用時間去同仔女建立感情。佢地會長大,總有離開我地身邊去勇闖既一日,回頭一諗,前幾年佢拉拉扯扯,淚流滿面上學去,到而家送返學叫我快D走喇,哈哈!又係一個值得回味既成長印記!