無聊問用心答

motherhood
by 呔媽Kelly
07/02/2017

有無試過對住小朋友，佢地問你D問題係好無聊，好無謂的? 仲要無聊問題唔係問一次半次，係每日每時每刻喎！如果有，恭喜你喇，你既小朋友一定係個想像力豐富，求知慾強，應該係個開朗活潑既小朋友。而佢地又有個肯不停回答無聊問題既父母，呢個小朋友一定好幸福好快樂！

我兩個仔就係咁樣，每日都講一大輪無聊既對話，話題可以天南地北，遠至恐龍時代，近至社區新聞。我所講既無聊問題，佢可以問你: 如果我100歲咁我會點呢? 咁90歲呢? 咁80歲呢? 一路問到0歲，即係想我講佢知每個歲數既人會做既事呀，健康狀況呀咁啦！又或者問: 如果我去左打仗咁你點呢? 咁我做警察呢? 咁我做老師呢? 我做送貨呢? 一路講D職業出黎問你，即係想我講佢知每個職業有咩唔同，要做D咩，危唔危險咁啦！然後佢又會話: 咁我第時做左總統咁你住邊呢? (美國選完總統，佢地學校又有講，已經上晒腦) 係咪一齊住白宮? 可唔可以細佬做副總統? 可唔可以響白宮曬太陽.. 面對住每日一百個問題，仲要係幾無聊下既，可能好多父母都唔想再答，或者直情叫小朋友唔好再問埋D無聊野。但唔知點解，我真係覺得唔係無聊，係小朋友既求知慾，佢地想知道件事係點。

好似我地覺得，佢大個點會去做總統呀！但佢學完關於總統既野，佢真係附合做總統既條件喎，所以咪問下入面有無得曬太陽囉，咁第時搬到去都知咩事丫嘛。係喇，就係因為我地覺得D野唔會發生，覺得答黎都多餘，其實咁樣係抹殺左好多小朋友想像未來既可能性。要知道我地大人，已經有好多框框括住我地既思想，知道好多野係無可能發生，會直接去努力於一D可以發生既事，但小朋友唔同，響佢地既世界裡面係咩都有可能發生，係可以天馬行空的。我願意去不停回答佢地所有問題，係因為除左答案比入面可以灌輸佢地正確知識外，最重要係比佢地知道，凡事只要比心機去做，想像既野真係可以實現的！等於被問到100歲會係點? 我會答: 可能老到行唔動啦，可能無晒D牙，食野好慢，要仔女照顧等等。唔會一句話: 100歲應該死左啦，就唔答了，咁樣小朋友又識少左野囉。