advertisement

上篇文章講開,好多父母係好鐘意拎自己D仔女同人地比較。不論係BB定係小朋友,都難逃此劫﹗
好多卜友和應,令我更想深入D討論下。大家可以點解去幫助仔女建立一個正面既人生觀,同時亦清理一下自己既思想。只要諗得通,就唔會咁易比人影響到自己對教育仔女既立場喇~

微博(@呔媽)每日都會PO呔細既攪笑事,有時大家見到呔細好錫對方,或者覺得佢地好善良,咁細個就有憐憫之心,卜友都會問,點樣可以教到佢地性格咁好? 想請教一下之類~

咁講實在太言重喇!唔敢話指教,教仔方面我都係新手媽媽,邊湊邊學。係想同大家分享下我D想法,希望幫到大家啦 ^^

睇開我既,都唔難發現我係非常鐘意抽水,意思係,我唔放過任何機會/ 事例去講解同教育呔仔細細。每件小事發生,都係一個好好既機會去引導佢地點樣去分析對錯。我覺得當有事發生既時候﹐即時灌輸正確思想係好重要!

而另一方面,當有事發生響自己身上,自己既即時反應態度。對佢地黎講亦係好重要﹗可能我講大左少少,但父母既生活態度,真係直接影響一個小朋友既性格。講幾多教幾多,有時唔及你一個反應一個動作黎得直接,此乃身教~

未講身教之前,先講下平時點樣過D大智慧比佢地~

「己所不欲,勿施於人」呢個道理係由我一個小學老師過比我﹗記得佢講過「做任何事之前,諗一諗如果換轉果個人係你,你會唔會開心? 你會有咩感覺?」呢個道理我一直擺響心。

真係好感激果位老師,送左我一個凡事為人著想既心態。因此好細個開始,我就灌輸呔細呢個道理。當佢地做左又或者想做一D唔好既事(e.g. 搶玩具,唔禮讓,無禮貌等…)既時候,我都會問佢地,如果人地同樣咁對你,你會點? 你會唔會唔開心? 叫佢地做事要諗後果,要顧及人地既感受,唔可以只顧自己快樂就令別人痛苦……(下刪數千字,個範圍可以好大架﹗你地因應自己小朋友既行為黎繼續講啦~)

「擁有多不等於快樂多﹗」呔仔上年9月開始返幼稚園,好多卜友都話擔心淋善既呔仔會比同學仔蝦~ 其實比人蝦少少,都係成長中必然遇到既事,問題係點樣令佢唔覺得自己比人蝦,反而覺得蝦佢既人其實好愚蠢~

返學唔夠幾日,大家擔心既事就發生喇!

記得當時係Play Time響公園玩,呔仔拎住個桶執緊rubber chips。
kelly_1
女同學自己有個靚桶,都要拎埋呔仔果個,換左個無手抽既比佢~
kelly_2
呔仔反應「無所謂,拎去~」 繼續用個無手抽既桶去執rubberchips~

我見到都幾安慰~ ^^

其實無手抽一樣係咁玩,邊個話有靚野先玩得開心?我教呔仔「個桶比人玩到爛左無手抽,証明呢個桶好好用,多人玩,先會玩爛。XD 你睇後面小朋友霸住3個。霸得黎都玩唔切啦,不如用自己擁有既野去盡情開心。即使係擁有得少。但快樂可以好大﹗」呔仔聽完,唔知佢明幾多,不過我唔理啦~

仔,就係咁教出黎!

Kelly_3

易滿足。就會笑口常開 ^^