照顧敏感仔

卜友們都知道﹐細細BB時好勁濕疹﹐焦頭爛額﹐發時成身成面一撻撻出水﹐無數個痕到典床典席瞓唔到既晚上﹐要我攬住佢比佢食奶﹐憑住媽媽既安慰奶味﹐總算係一晚又一晚咁捱過去~ 直到8個大左右﹐終於試出一個「煲芫茜水浸身」既方法﹐先叫做斷尾9成有覺好瞓~ 家陣佢D手指腳趾都仲爛架﹗不過比起果段黑暗時期﹐已經係叫做上左天堂架喇﹗

濕疹叫好番﹐1歲零時就發現佢對花生敏感喎﹗仲要係嚴重果隻@@ 之後自己小心﹐都叫無咩中過招~ 係上個月我一時無留意比左D mix nut既野佢食﹐好彩只係食左少少﹐我諗果度夾埋1粒花生左右啦﹗不過已經成身出晒疹﹐上埋頸﹐痕到佢飛起~

醫生話花生敏感係大鑊野﹐一定要好小心﹐因為反應可以好嚴重﹐有機會抖唔到氣﹐有生命危險~ 當然盡量避﹐但唔係時時留意到嘛﹐特別是佢開始大個﹐會同同學仔一齊食野呀咁﹐唯有係提醒佢多D等佢自己知道要避啦~

至於呔仔﹐無濕疹又無食物敏感﹐以為大步欖過啦﹗點知上年開始哮喘@@ 而家入冬每日早晚聞氣﹐預防哮喘發。近2次開始黎料﹐都係因為感冒咳引起﹐佢有哮喘底﹐變左一咳開就好難停~ 呔仔之前驗左血﹐但驗唔出對咩敏感﹐所以呢日就約左Allergy Specialist﹐詳細測試下2個對咩東西有敏感反應~

呔仔細細輪流比人篤背脊

圖中有反應既地方係敏感。測試結果發現﹐呔仔對塵蟎同動物毛感敏。而細細就對塵蟎﹐花生﹐合桃同雞蛋敏感。

關於塵蟎對呼吸道既影響﹐其實都略有所聞。既然而家知道佢地2個都對塵蟎敏感﹐更加要做足D盡量減少佢地接觸到呢樣野﹗

醫生建議唔好用布窗簾﹐地毯等容易滋生塵蟎既布具。用纖維床品可減少敏感﹐用膠套包床褥包枕頭防塵蟎﹐另外就係經常高溫洗焗寢具殺菌~ 有朋友用開吸塵蟎機﹐有機會我都想試下睇下會唔會幫助到~ 其實上年呔仔哮喘開始已經拆左全屋地毯﹐換晒D羽絨被同枕頭﹐做足防敏工作﹐而家可以做既都係keep住屋企清潔乾爽﹐減少佢地病發機會。

房間入面容易滋生塵蟎既地方

包床褥