追追追，跑跑跑，唔好咁易放棄！

從遲仔身上學習寶貴的一課。

今日發生左一件好驚險嘅事。

話說，今朝一起身，感覺瞓得好舒服。但一望下鬧鐘，原來已經係七點七。當時第一個諗法係，點解個鬧鐘無響嘅？第二個諗法係...，大鑊，趕唔切送阿仔上校車啦！

平時我同遲仔係大約七點鐘起身，跟住輕輕鬆鬆食早餐，換校服，大約七點七就出門口等校車...。但係，宜家七點七先起身...

我即刻彈起身叫醒遲仔，同遲仔講：快啲起身啦，七點七啦，趕唔切搭校車架啦，我地快啲梳洗換衫，趕去搭小巴或的士啦。

點不知，遲仔一面梳洗一面講：試下啦，可能趕得切呢？

唔知點解遲仔有呢一種堅持。好啦，就同你一齊試下啦。

遲仔超高速咁換校服，出門口又咁啱有電梯，落到樓下，咁啱又見到架校車從遠處駛緊過來...

我即刻同遲仔跋足狂奔跑跑跑、追追追...

結果，我同遲仔趕得切，等緊上車時，我見遲仔一邊喘緊氣，一邊露出滿足的笑容。

Mission Impossible最終完成。

這短短十多分鐘，我從遲仔身上上左寶貴嘅一課。

「遲仔，爸爸要學下你，唔好咁快話唔得，咁快話放棄，點都試左先啦。

試左未必得，但唔試，就一定唔得！」

做爸爸的，唔一定啱晒，要虛心向仔女學習！