甚麼價值觀?！

「笑貧不笑娼」絕對可以形容現今社會風氣，呢個社會現象真係令人心寒！點解個社會會變成咁呢? 窮人就無尊嚴? 有錢就有尊嚴? 但我深信，尊嚴係來自一個人既人格！

朋友話，響香港做全職媽媽，非常唔受重視，差在未比人出口話「廢」。得唔到親友支持，就連樓下多口阿姐都會同佢講「哇！你咁後生就唔做野，有錢都唔搵喱埋響屋企湊仔? 咁辛苦讀飽書做湊仔婆?’」講到全職媽媽到好似社會寄生蟲咁！

阿姐，我想講全職媽媽其實比女傭既工作更忙。而我地揀得做全職媽媽，D仔女係自己既，一定200%心機對待！年中無休去湊不特止，勞心勞力去教先係重點！教得好係自己既，兩公婆覺得值得就OK啦。呢個年頭，真係唔係咁多人願意同夠耐性全日對住小朋友，又肋緊褲頭幾年自己去湊，絕對值得尊重。

但好得意架喎！無錢既全職媽媽先會變成社會寄生虫，如果有錢呢，就變成‘好好喎！「少奶奶響屋企湊下仔」個感覺係令人羡慕架喎！少奶奶有工人洗衫煮飯湊小朋友，自己可以享受人生，同全職媽媽係兩回事黎架。兩者都係無收入，對於全心付出不問回報，日日做到隻狗咁既全職媽媽，唔稱讚不特止仲會睇低。但一聽到人地有錢唔使做就，正喎！幸福少奶奶喎！條命生得好啦！有錢人即刻被睇高一線。

同親友講開，發現唔少友人因為屋企有D錢，無經濟壓力，有得痴屋企就hea到不能，懶懶散散。見到呢D例子，我都驚第時小朋友因為有屋企靠，無經濟壓力就好易變懶，所以到咁上下真係要比D責任佢地，要訓練佢地有承擔！我反而覺得屋企有條件既，就更應該利用呢個優勢去追求理想，唔需要為口奔馳為份糧做事，就更可無顧慮地向前衝，有屋企支持更事半功倍！點知親友話，佢有得靠係好事喎！唔係人人有呢個條件去hea，最緊要屋企有錢！下? 咁樣hea法都係好事?? 成世人就係咁樣浪費左喎！咁都係好事? 親友就話喇，我覺得浪費，可能人地覺得日日返工先on居，先係浪費人生呢?！呢個理論對我黎講，簡直係歪理！

講來講去，又係錢作怪！我覺得而家呢個社會已被金錢支配，人到左是非不分既地步。人人都覺得有錢就有尊嚴，不論人格好壞，有否志氣，只要有錢就會被尊重被羡慕。如果呢一代既家長抱住呢個價值觀去教仔，試問下一代又點可以建立到一個正確既人生觀，價值觀呢? 係時候，大家要尋找返失去左既人生價值，為理想而奮鬥，為開心而活，有好多野唔可以用錢去衡量！就如我之前幫卜友們買TOMS不收分文，有朋友會話我無謂，覺得我浪費時間買完又要pack箱寄，搵自已笨。但我想講，呢個世界唔係每樣野都要計算，都要賺錢。大家分享開心，果份快樂係永遠無辦法用錢去買。我只希望用自已小小力量，去帶比更多人正能量，話比大家知，呢個世界仍然有愛！^^