學好廣東話

數數手指，1997 年走，咁就黎左美國17 年喇。由當初成日諗住回流，到而家竟然響度落地生根，2 個仔仲係ABC (American Born Chinese)。無辦法吧，始終呢邊比較適合小朋友成長，即使個心幾眷戀香港，目前一切都係以小朋友為先。

呢邊班朋友朋友D 仔女，同呔仔細細一樣，都係響度出世，屋企都係講廣東話。隔左一排無見，前幾日見面時，個個都滿口英語。即使朋友係講廣東話，小朋友都係用英文回答。可能因為佢地讀既Preschool 較少亞洲人，而呔仔細細學校8 成係亞洲人，仲有一部份講廣東話。雖然老師與同學之間係用英文溝通，但同學私下都會講中文，加上呔仔細細只係返半晝，所以仍處於中文比英文好好多既階段。

我地屋企完全零英語，日常對話亦唔會專登去教佢地英文，所以呔細仍然滿口廣東話，仲要係好地道果隻！佢地會講「勁攪笑！」「好食到爆呀！」「超正喎！」’呢類助語詞，哈！

其實之前有睇過唔少關於雙語兒童既教法，認為父母在家應該只講母語，幼兒以學習第一語言為主。而英語可以話係第2 語言(暫時啦！好快爬頭架喇!)，唔需要重點學習。原因係年幼小朋友多用身體語言接觸，而且唔同國藉既小朋友們都處於學習語言階段，即使言語不通亦唔會出現溝通問題。

其實都知道呔仔細細一上小學，都走唔甩滿口英文，而廣東話亦好快淪為只會同我地溝通既語言。但本人覺得廣東話真係太強勁了！好想好想兩個仔長大後，講到一口流利廣東話。識睇識寫就難D架喇，好多響度長大既朋友，細個讀中文學校，大大下都唔記得晒，真係要keep 住用，多睇多寫先會記得！唔好話佢地，我成日寫野，但有時有D字耐無用，都真係唔記得點寫，加上而家打字多過寫字，更令肚中墨水加速蒸發。

除左平時用廣東話對話，每晚睡前我都會講下故事比兩隻野聽。呔仔好鐘意我讀《阿呢漫畫》’比佢聽，佢唔識睇中文，但D 圖畫同故事好吸引，所以佢好想我讀比佢聽。另外，上次返香港買左呢本睡前故事，好好呀，唔使自己諗餐飽嘛！而且每個故事都有教育意義，故事內容易明，幾有趣，我自己都鐘意睇。既然呔仔細細都鐘意聽廣東話故事，趁今個暑假，教下佢地寫D簡單既中文字先！^^