advertisement

中三過黎美國,響度讀左4 年High School (即香港教育既F.3 - F.7) 之後升大學。大學時開始寫卜,當時已有好多卜友話,點解你成班friend 都係香港人既? 點解一隻鬼都無既? 響度讀書應該有D 鬼仔鬼妹朋友架? 無錯,同學係大把,但講到做到friend,都係要同聲同氣先岩feel 既!\

 

自己響香港土生土長,讀書果陣一放假就走返香港架喇,一年都有4 個月響自己hometown。讀書時都見到唔少港人同學鐘意同鬼玩,影晒貼面相擺上Facebook,即係果D 大家見到會覺得,哇!外國讀書真係好正呀,又有鬼妹鬼仔同學,Friday nigh t一齊落club 飲到high晒...之類啦。所以點解D 卜友會咁問我,因為大家心目中響外國讀書就係呢種嘛,哈!而我地呢,成班friend 就搬左香港黎美國,放假梗係開臺打牌啦!

 

對於外國人既culture,老實講真係文化唔同,差異都幾大架!呢度係shemom,媽媽地頭,唔講其他,就講學習同家庭教育,都已經完全唔同。當然無話人地果D唔好,每個國家,唔同文化都需要尊重既!

 

先講講學習方面,好似我咁,香港長大,接受傳統教育,自己本身對師長有份敬畏,我當然希望呔仔細細都識得尊師重道。唔好講到孔子果D 咁聖言,起碼知道要對長輩尊重。好似呢邊返學咁,老師除左教書外,唔會教道德禮儀之類既野,例如老師入課室同落堂,學生都唔需要打招呼,對老師無左果份敬重,見到D 學生完全唔驚老師,有時人權太大,小朋友咁細個就咁自我,我覺得唔係咁好。大學更甚,可能外國人老師連自己都唔覺自己係師長,又可能佢地根本無呢個慨念,所以大家打成一片,齊齊響課室隔望食煙吹水,真係what a happy study!

 

今年呔仔升既小學,學生比例佔大部份係亞洲人,有朋友話唔驚佢地學唔到英文嗎? 唔怕,響度出世既小朋友,英文一定係佢地母語。我見差不多100% 既ABC 仔,同輩之間都係講英文的,驚佢地大大下唔識講中文多D。我自己認為始終亞裔家庭比較著道德品行,同學乖考D,對呔仔細細成長較好。而且大家文化接近,家長或同學之間既溝通都容易D。

 

至於家庭觀念,據鬼妹同學所言,佢地一般一夠秤就自己搬開住,或者去第二度讀書。好多同學都係同朋友租住,咩都係自己攪掂果隻。原來唔止仔女鐘意獨立自由,連父母都係鐘意咁樣!仔女大左就各顧各架喇!我諗外國人既教育就係咁卦?!我認同獨立係重要,特別是男仔,但獨立之餘,我覺得親情都係相當重要,對屋企要有歸屬感同責任心。之前睇過有D 外國媽媽討論區,類似講話BB 一出世就要擺佢自己訓一間房,要開始訓練佢獨立,唔好比佢慣左痴住你。我又覺得,絕D 喎!!不過好老實,從小點樣教育,就會有點樣既小朋友,無話點樣係岩點樣係錯,只係大家想要既野唔同。所以我話,睇你想仔女長大後家庭觀念如何,想佢快D 獨立自己生活,定還是好似我地咁,想仔女未結婚都仲留響自己身邊,一家人互相照顧,呢個就睇自己點選擇喇。

 

DSC09305rs