advertisement

好幸運呔仔同細細只差15 個月大,兩兄弟一齊成長,感情好好,基本上已到左唔可以無左對方既地步,哈!一起身第一時間梗係搵對方,有時一個訓左去床尾唔見人,另一個好緊張即刻問架喎!之後兩個就一齊起身去刷牙,一齊出廳玩,無論做咩都一齊咁滯架喇。偶然都會爭下野,但一被罰呢,會即刻是非不分地維護對方架喎!一個喊,第二個就跟住含淚架喇,攪到佢地就兄弟情深,我就麻木不仁咁款!當然我唔同意佢地是非不分,但每次見到咁既情形,其實我好欣賞,好感動架!諗下呢個世界上,要有幾好既感情,先會有人是非不分咁盲撐自己呢? 如果唔係緊張對方,又點會攬佢上身呢?

 

間中都有卜友問,呔仔同細細既感情咁好,係點樣教出黎呢? 其實真係無特別去教呢樣野,可能係兩兄弟相對接近5 年,產生出深厚感情吧!而我諗我對佢地平時既教導,都有影響佢地對對方既感覺。

 

年紀相近好處多:

 

因為年紀相約,細細出世時呔仔得1 歲多D,仍處於好需要被照顧階段,變左我唔會只顧細細唔理佢,無因為顧細唔顧大而呷醋既機會。反之,除左細細埋身食奶外,日間時間都係一樣咁湊呔仔,夜晚就攬住細細訓同餵奶。爸爸亦醒目補位,陪玩陪食沖涼暗訓,令呔仔覺得多左細佬都幾好丫。而爸爸因為多左湊呔,同呔仔既關係仲親密左添!

 

而為左呔仔唔會覺得多左細細,我會忽略左佢,我亦出左一招幾絕下既,就係唔可以咁緊張細細BB!(個心當然緊張啦!但唔可以表現出黎!) 所以每當細細喊呀扭呀,我唔會第一時間衝過去,特別是同呔仔玩緊時,要表現平靜由佢喊陣先!而大多時候,我會派呔仔去睇下細佬咩事,叫佢幫手安撫下細佬。唔知係咪日子有功,呔仔習慣左照顧細佬,反而一聽到細細喊,會自動過去睇佢,可能兄弟情就係咁樣培養出黎。

 

另外,大家都知唔同年紀既小朋友,教法唔同,可以話年紀愈大就愈嚴格!因為佢地明白道理,亦多左規距要遵守。如果年紀相隔遠,就容易出現問題。因為大果個又唔係真係好大,事理一知半解,但你又要對細果個放寬,對大既嚴緊D,變左大果個好容易就覺得你偏心,咩都就晒細,個心自然唔妥佢!如大家年紀相近,教法一致既話,就唔會出現呢個問題。

 

仲有一樣野,大家都需要緊記!就係唔好為左細果個去鬧或者罰大果個。好多時候其實大既只係對BB好奇,但我見過唔少父母反應過大,驚整親BB 而大喝大罵,時間耐左,除左令小朋友對BB 失去興趣,關係疏離,經常被鬧亦會令佢對BB產生反感。其實大家可以比小朋友多D 參與湊BB,可令佢地關係親密D。同時亦要耐心教導,賞罰分明,唔可以話‘細個唔識野’就唔使罰,大亦唔一定永遠要讓細,要比佢地知道其實爸爸媽媽係公平,兩個一樣咁愛錫的,咁兩兄弟感情自然好吧。

 

1 2 3 4