advertisement

從小教導呔仔細細,響講解每件事既時候,講得最多既係:如果人地咁對你,你會點?會唔會唔開心? 如果人地咁一樣咁錫你,同你分享,你係咪都會覺得好開心呢? 將心比己,你唔鐘意既,人地都唔會鐘意。人地對你好,幫助你,你覺得開心既話,你幫助別人時人地一樣會快樂!咁樣教導小朋友,佢地容易明白之餘,亦可以令佢地學習了解別人既感覺,學習對別人尊重同體諒。

 

 

前日,呔仔學校開家長會時,差不多所有家長迫爆一個飯堂,要聽校長講野15 分鐘,之後先分別入班房了解仔女試堂情況。當然早到的有位坐,因為全場只有10 張食飯果種連飯臺一字凳。我準時到,幾經辛苦搵到一個單人位,隔離係個小女孩,佢隔離有爸爸同埋佢細妹共3人。差不多開講時,小女孩見到離遠既同學仔,即飛奔去擁抱打招呼。此時有個媽媽推住BB車,條路已經窄,佢慌忙地四圍望,見到我身邊有個位,鬆一口想坐低。點知小女孩個爸爸竟然同呢位媽媽講"個位係我個女架",咁個媽媽唯有起番身,而同時間,我讓左我個位比呢位媽媽坐。不瞞你,我果刻都幾氣憤!第一,你個女自己走左去,張凳無人坐緊,你有咩權唔比人坐? 第二,人地推住個BB,關愛座都係讓呢D有需要人仕先啦!你咁想比個女坐你咪讓你自己果張比佢坐囉!你個女坐你大脾都得啦!男人老狗牛高馬大,竟然幫個女霸住張凳,仲要你有3個位都唔讓一個比人,你有無廉恥架?!你自己都有2個女啦,諗下如果呢個係你老婆又或係你個女,響需要幫忙時遇到D 咁自私既人,你又會好受嗎? 身教係小朋友成長中好重要既一環,望住佢D女,我只感嘆,希望你地懂事後,唔好好似你爸爸咁自私,要多D為人設想,唔好只顧自己。

 

 

好記得讀小學時,教英文既陳老師講左一句說話,令我畢生受用,我記到今時今日:己所不欲,勿施於人!將心比己,凡事設地而想。意思係你唔想人地咁對你,你就唔好咁對別人!我覺得講得好岩,亦成為我做人既左右銘。凡事顧及別人感受,你識得尊重人,同樣別人亦會尊重你。

 

 

~背起呢個書包,希望你地返學除左學習書本知識外,亦要多多學習做人既道理!~

 

1 2 3