advertisement

近日響 Facebook Page度 PO 返呔仔細細啲BB相,大家卜友都好懷念,成7,8年了,好多都係我地結婚,佢地出世時,響 Yahoo Blog 年代已經睇我地。之後又去Youtube (搜尋: tylerthebaby) 睇返佢地細個嘅短片,回味一下當年經典嘔奶片段,哈哈!

 

睇睇下,我同老公開始睇返呔仔細個講野嘅短片,哇!睇返先發現,原來佢細個講野咁有問題,發音全句錯。我地而家有印象地聽返,都未必明得晒。唔怪得之當時 D 朋友完全要靠我地翻譯先明佢講咩。而細細後來完全跟左呔仔講野發音,同樣完全聽唔明 @@~ (當時問過語言治療師,細細唔需要訓練,因為佢一開始講野係清楚,只係學左哥哥發音,慢慢跟返我地就無問題,結果又真係如佢所講喎!)

 

B

 

但最奇怪係,當時嘅我係完全唔覺佢大問題喎!係,講得無人地咁清楚,但我完全明白佢講咩,所以到3歲9個月,先真正面對,帶佢去語言治療。其實諗返 timing 都好啱,因太細個未識聽指令,帶佢去都未必可以專注,坐定定1粒鐘做練習。治療師發現佢發音時條舌頭唔伸出,比較複雜。要每星期去訓練一小時,再加自己響屋企每日同佢做訓練,維持左5個月左右,發音情況有明顯改善,舌頭開始識頂向前,大部分之前發唔到嘅音都發到了!果時佢每發成功到一個音,我真係好興奮架,同呔仔一齊努力嘅日子,自己又唔可以表現心急比壓力佢,諗起都有 D 眼濕濕。

 

過來人經驗所談,小朋友發音有問題,係要用時間去訓練舌頭擺動配合整個口部開合,唔會突然講到,所以做父母唔好心急,不停迫佢跟你講,只會形成心理壓力,弄巧反拙。另外,我發現當時唔少朋友鍾意跟佢地講野,係出於想同佢地開玩笑,但盡量都要避免,特別是如果小朋友知道自己講野唔正,佢地可能會覺得羞愧,更加唔敢講唔敢嘗試。有時大人開嘅無聊玩笑,可以對小朋友做成好大影響架!其實大人可以做嘅,係盡量令佢地放鬆,唔好令佢覺得自己有問題,大人只要說話清楚,做個好榜樣比佢睇就夠了。

 

後記:呔仔上小學後,老師都有發現佢某 D 英文發音唔太好,已有駐校語言治療師跟進呔仔嘅情況。廣東話黎講佢基本上講到9成正常,而學校同佢改進嘅係英文發音。希望不久將來佢中英文都可以講得好好啦!

 

睇返佢地細個點講野 >>

 

https://www.youtube.com/watch?v=q8oqPW61u0w

 

https://www.youtube.com/watch?v=zYcLRHjYvDk