advertisement

記得細個好鐘意返學,特別是放完暑假開學,可以見返班同學仔,小學就睇下邊個高左,又換左個咩書包,有咩新文具新水樽交換睇下啦~ 中學仲開心,睇下班女仔剪左咩髮型,講下暑假做左D咩(summer無見果班),又睇下今年班主任咩料,易唔易蝦,同邊個坐,有無高左可以坐後D偷食野無咁易比人捉,放lunch又可一齊開餐,哈哈!

但近呢10年8載,香港教制變了,學校同父母心態隨著改變,唔難發現年年都有學生不堪壓力自殺,講緊小學生初中生,竟然壓力大到要自殺!我地身為父母,真係要正視呢個問題,唔可以將責任推比社會推比學校,自己都應該反省與及多D同仔女溝通,了解及開解下佢地既心結。

做父母既,一定望子成龍,希望仔女第時做醫生做律司。但過早將自己對仔女既期望交咐,令佢地一早背負住“讀到書第時先搵到錢”呢D壓力,咁就死得啦!即係成績一差,我大個就做乞衣架喇,又愧對父母驚比人鬧,不如死左佢算啦!你以為我講笑? 根本小朋友諗野就係咁直接,佢唔係咁諗,又點會擔心到要跳樓呢? 佢唔識諗就算讀唔到書,都可以有好多出路,一個人既成就,生命既意義並唔係第時搵到幾多錢!呢D真係無得推卸,佢識唔識諗係睇你點灌輸佢,佢既人生值價觀係由父母從小引導。有D父母鐘意將小朋友同人比高低,你可能唔察覺,佢企響你身邊睇住你bi lee ba la講到佢幾叻幾醒目,壓力就係咁樣形成囉,佢驚佢下次衰左你無面呀媽咪!

其實小學生初中生,學好品德,學需要學習既知識就夠架喇。好似好多家長會嫌學校比既功課太淺,自己又發晒矛再比workbook佢地做,死操爛操,真係堅多餘!升班前已學晒黎緊一年要讀既野,其實知唔知咁樣係好錯!我地呢邊D老師都有講,功課千祈唔好做先或者做多,因為咁樣會嚴重影響該小朋友 以及其他同學學習!特別是上堂時當大家都好專心去聽書,去學習新知識既時候,如果小朋友已經識晒,佢就會對課堂失去興趣,唔可以專心聽書,即使踴躍舉手答題,亦唔係佢響課堂上學習的成果,咁你返學做咩? 點解唔home schooling自己考上大學咪得囉,right?

另一個引伸出黎既,係小朋友性格問題。當小朋友覺得自己比其他同學叻,識既野比人多,自然會產生驕傲感,而呢種驕傲感就直接影響佢既性格,對其他人既尊重同人際關係,我諗大家都見識唔少鐘意認叻同講野叻唔切既小朋友,唔知你地咩感覺呢? 唔好忘記同學間既人際關係,對學生黎講可以係好大壓力既一件事,人際關係差,返學好唔開心架!

所以話,漫漫長路慢慢行啦,父母責任係陪佢地健康快樂地成長。改變一下自己既想法同人生態度,仔女既思想亦會有直接的好影響,少點壓力多點愛。加油!共勉之!

12004807_10153157166916586_1443053794940699565_n