advertisement

美國呢邊學校比較少壓力,呔仔之前響 K 班每一日都好 playful 咁學習,老師主要幫佢地適應小學生活,因有 D 小朋友之前無返過學,真係5歲先開始學 ABC。而家升上左小一,課堂多2小時,之前返8點半放1點,而家放 3 點。據知開始學寫英文句子,睇多左好多書,文法等,另外又多左科學呀,社會呀,體育之類科目。

 

之前就一星期交幾張功課,而家每日都有幾張功課紙,大大隻字 10-15 分鐘做完果種。睇黎壓力不大,係慢慢加上去,唔係突然增量,小朋友比較容易適應。特別是學校好似聯合國,各國人種都有,D 水平好唔同。好似細細而家讀緊同校 K 班,老師比份好簡易的功課,比一星期做,都講左覺得深既可以唔做,可只練習寫自己個名,而覺得淺既就做完可以自己再寫句字練字,証明同學們水平可以差好遠。

 

承接上年呔仔完成 K 班時,靚仔阿 sir 話佢好 OK,英文進度無問題。同埋阿 sir 講出左一樣我留意左呔仔好耐既野,就係佢上堂聽書時,好少會望住老師,而手上係必定會搵 D 野去攪,即係見附近有咩都會拎上手玩弄。但阿 sir 話,你以為佢唔留心聽書咩,你問佢野佢係完全答到你,知你講緊咩,其實一直聽緊書。呢個現象,佢響屋企都係咁,佢無論做緊 D 咩,梗係就不能專心,可能隻腳要撩下其他野啦,食飯又要攪下臺面 D 野,做功課又坐唔定,一時去廁所一時行去拎野。發現佢經常一心多用,好專心咁做緊一樣野時,但個腦又諗緊其他野(傻強d friend @@)。

 

上次同朋友講起,佢話似係有 D 活躍症,因活躍症既人係要靠身體不停活動先帶到氧氣比大腦,先可以專注去做一樣野。即係其實要 keep 住活動,個人先可以正常地運作。如果係咁,又解釋到點解呔仔停唔到,一係不停講不停問,佢求知慾係 200%,一係不停玩,睇書漫畫書都好集中既,但會 keep住改編個故事同埋大笑,睇電視就好專心既,坐定定唔動,但就會不停同隔離細佬講劇情。呔仔活躍就肯定係,呢幾年返學佢真係變左好多,由初初同學行近 D 佢都會避開,到而家佢應該係去整古人果渣架喇,睇佢多野講到呢,日日同佢好似問答比賽咁,每日放學返黎講好多學校既野我聽。但係咪過度成一個症狀,就應該唔係,呢 D 細個男同學都常見,坐唔定攪攪震,但話得聽控制到既。

 

睇呔仔帶返黎既每日小評,都做得唔錯呀 ^^

1