聽在心裡的說話

早排 「聖雅各福群會 – 樂寧兒童發展中心」編印一本贈閱書，內容關於小童語言治療的。佢地搵我寫序，大概知道我係過來人，因為呔仔小時候講野極不清晰，4歲仔朋友要估佢講咩，我地都係經過語言治療師幫助，而家呔仔講野又快又清楚了。當我收到邀請時，二話不說就答應，真係好想自己既經歷可以鼓勵到其他家長。

呢本「童說同樂」，內容係關於小童語言發展同構音資料，同時亦有認識言語治療，促進言語發展既技巧，亦有一D幫助小童訓練言語既遊戲活動。大家有興趣可以打去以下中心，問下相關資料。同埋如果真係有需要既話，可以聯絡中心排期幫小朋友做言語評估，睇下可以點樣幫助到小朋友。

以我自己經驗黎講，爸媽們其實唔使太擔心，記得果時呔仔4歲，講野完全無人明，都係咁樣訓練返黎。好多時小朋友講野唔清楚，係因為佢舌頭唔識擺位，呔仔果時就係因為佢講野舌頭唔動。只要做多D口腔同舌頭訓練，就會發到果D音。大家記住，小朋友學講野，千祈唔好比壓力佢，外人亦唔應該取笑佢，壓力都會形成佢唔敢講或者令情況更嚴重。記住一點，就係千祈唔好自己講完個音就猛咁迫佢，要佢講得正，因為咁樣係無用，如果佢講到就唔會講唔到，呢個係佢舌頭擺位配合口腔肌肉既問題，經訓練後自然會發到個音，勉強只會令佢沮喪，對治療並無幫助。