無重的快樂學習

前排響Facebook Page寫左呔仔細細家長會點滴，所謂家長會，其實係去同老師傾幾句。而所謂既Report Card，老師講明數字不能作實，大家唔需要太介意，因為小學學習除左英文數學知識同讀寫程度外，更重要係增加小朋友對學習興趣，同埋德育等多方面發展。因此大仔老師對佢聽書時攪呢攪路(但答到問題架喎！)，成日離開坐位等理解於“They are KIDS!” 係，細路就係坐唔定，特別是男仔，需要走動放電，響唔影響同學上堂情況下，老師覺得OK，仲話自己都邊講野邊轉筆，都係一個小行為，唔礙事的。香港既卜友對老師一番體諒非常欣賞！有D嘖嘖稱奇，感嘆香港既家長會，老師們會不停打擊你，話你個小朋友呢樣要改善，果樣要努力，次次見完老師感覺好差，會將壓力轉移比小朋友，因為開到口話你做得唔好，又怎可無改善。相反美國呢邊既教育，老師會不停鼓勵，比信心小朋友，亦比好大信心我，令我覺得原來我個仔OK架喎！可能係呢邊個range比較大，老師接受到小朋友1年級仲要數手指加減，我大仔7歲仲數緊手指。

我從來無比過學習壓力兩個仔，我又從來唔會將佢地同其他小朋友比較，簡單D講我唔係好理人，即係就算人地同我講佢小朋友識D咩呀，幾叻都好，我唔會轉移壓力比兩個仔，覺得佢地唔夠人叻，要催谷等。哇咁攪法好唔得閒架喎！呢個世界大把人叻過你，又差過你，所以老師話無問題，就無問題架喇，無謂庸人自擾啦。我覺得讀書叻當然係好事，但絕對唔係唯一，就等於長大後搵得錢多，係好事，但亦唔係唯一。

咁你可能會問喇，美國咁hea既教育制度，小朋友真係學到野嗎? 一年觀察呔仔細細(加埋我自己中三來美讀至大學畢業)，我可以講，呢種絕對係又愉快又成功既學習模式！

輕鬆無重學習，令小朋友好鐘意返學，而成功感同老師既稱讚，會提升學生對學習感興趣。書本以外有好多互動教學，外遊等，大大擴闊小朋友思維，等佢地見識多D思考多D，明白每件事情唔止得一個方式可行，呢個對以後既人生好重要，做人千祈唔好默守成規，唔係好易鑽牛角尖的。學期之初，剛升一年級既呔仔可以話係全無墨水，不能正確讀句子，會跟字頭亂讀亂撞，好事，好多野係撞出黎，最緊要有興趣鐘意睇鐘意讀。我覺得家長唔需要當場不停糾正，咁會挫敗佢覺得讀極都錯，無癮。然後呢一年，我睇住佢日日放學嗌開心，返黎開始自己做功課，D字肉酸到呢(拿係佢爸爸認為咋！本人以藝術角度去睇我覺得幾靚添架！)然後由讀唔出一句句子，無幾耐就自己讀得晒成本故事書，仲開始捉我英文發音錯(係喇係喇，我地呢D港式英文係咁上下啦！) 聽到D唐人同學仔家長，話呢個老師好hea，完全無壓力比小朋友，我反而發現，咁樣既老師先係好老師！原來小朋友，可以響無壓力既情況下學到咁多野！！琴日，呔仔有份功課，係Reading Report，我洗緊碗，叫佢自己做。見佢坐響度睇完一本書，然後開始埋頭做，果大半個鐘無行開過無攪過任何野亦無講過一句說話，對我黎講係異事！至少我7年來無見過佢咁樣，事實我有曾經覺得過佢係咪有活躍症? 點解手不停攪野，口不停講野又坐唔定。之後佢做完行入黎比我睇，我感動了，佢竟然自己完成左一份功課，仲要有紋有路的。好想多謝佢既老師，佢咁hea都有咁大進步，真係令我又驚又喜！哈哈！