訓練小孩自律 等於事事要他服從?

要訓練小孩自律，真係一個非常大既難題！唔好話細路仔，我地大人自己都好容易有唔自律既時候。究竟點樣去培養小朋友有自律性呢? 呢個又係對於佢地成長 與及將來過一個點樣既人生，有好大影響的。

好似我地細個返學，所有野都有時有刻，有規有矩，小朋友跟住D框框去做，呢樣係學習到服從性，但訓練唔到自律性。我反而認為，自律性係要從自由中培養。

舉個例子，就用我自己為例，小朋友出世之後，由於全職湊仔，我無一份穩定朝九晚五既工作，所有工作都係 freelance 形式進行。換句說話講，我工作方面既自由度係非常之大！呢8年來，我就係咁樣培養出自己既自律性。由於無任何特定時間限制，我可以選擇先苦後甜，一早清晒D野佢，又或先甜後苦，再甚或齋甜唔做又得。變左好多野就要自己去安排時間，而唔係每日返工放工咁既模式。我覺得咁樣好好呀，自己人生自己規劃，湊仔既時間亦容易遷就。近日識得大仔既同學爸爸，都係咁樣轉左做 home office自己接job做畫圖則。大家提起工作，都同意自由愈大，自律性就要更強！

講到呢度，咁究竟小朋友又如何去訓練呢? 個重點就係，給予適量既自由度喇！唔係話所有野都任佢地自己做決定，但可以比自由佢地安排返自己既事。簡單舉例，星期六日， 有一日係要留響屋企幫手執屋清潔，有一日可以出街玩，咁就可以比小朋友決定邊日去街邊日留家。然後話佢地知，要對自己既選擇負責，決定左就要做得到！又或者好多野當我地想幫佢地決定時，不妨比多一個選擇佢地自己去諗，當然果個多出的選擇都係我地掌握入面架啦，但小朋友就會覺得自己有話事既權利，亦會心甘情願去做好自己既決定，正所謂條路自己揀…哈哈！

呢個方法去訓練小朋友自律性，佢地從選擇之中會學識衡量輕重，會比較兩樣野邊樣係自己喜好多D，得出佢地覺得滿意既效果(雖然我地未必同感 haha)，又有成功感。如果所有野都係爸媽決定，佢地只識聽從，其實都唔係一件好事，長大後會失去自己獨立思考能力。更何況其實我地都知道，長期受制既人一旦重獲自由，就會放肆爆發，而小朋友終有一日會長大，可以唔再under我地，所以我地唔可以用霸權方式去教仔，一定要比適量自由佢地，令佢地覺得受尊重之餘，亦可從中學習自律性。