advertisement

或者爸爸係個大細路,響我地屋企黎講,兩個仔經常可以放任地盡興一番,望住佢兩個時時笑到見牙唔見眼的樣子,其實好戥佢地有個快樂既童年開心!我覺得,做父母的偶然比仔女放任一下,自己亦能放鬆心情,對大家都係好事,增進親子關係,對小朋友亦係一個特別既回憶。

有時聽到其他父母湊小朋友,一定要佢地跟足schedule,起床早餐,午飯午睡,晚餐睡覺都要在定時內進行,平日返學日不外出,假日偶爾出街, 夜左就要趕住衝返屋企推小朋友9點前上床入睡,真係聽到都大壓力。唔係話要攪到班細路無規無矩,晚晚跟住大人夜訓,而只係間中任性一下,我覺得無傷大雅,無必要攪到衝鋒隊咁,確實誇張得很。

朋友話,個囡好煩好難攪,下午兩點一定要午睡,而且一定要響自己屋企張床訓!結果放假外出Lunch後想行下街都唔得,要快快步仆返屋企比個囡nap,唔係又喊又扭計。好羡慕我兩個仔細個,可以去到邊訓到邊,基本上佢兩個可以出門口響車訓,落車抱佢地入餐廳,到再抱返上車,再抱返入屋訓過夜都唔醒既,真係好勁!

我就覺得,自己能掌握的事,唔應該比太多規限小朋友,小朋友其實適應力好強,你灌輸一個點樣既生活模式比佢地,佢地就會自動設定,所以點解D細路會難攪,咩都唔肯妥協,其實講到尾,都係大人造成既結果。以前無咁好既環境時,D父母要帶埋細路返工,個細路眼訓起上黎響邊都要訓架啦,仲有得話一定要訓返自己張床嗎? 無得揀,咪又係要妥協。所以都係睇父母們點樣做法,就得出一個點樣既小朋友吧。

偶爾比小朋友放任一下,唔需要下下跟足schedule,除左可以加強佢地對突發事件既適應能力,亦可令佢地知道,原來自己本身既生活模式之外,生活仲有好多可能性,對於佢地性格成長都係一件好事。我覺得適應力高的話,頭腦亦會靈活D,因為呢個方法行唔通,就自然會諗另一個方法去解決問題。等於我9點上唔到床訓覺咩,我咪10點先訓囉,其實無問題架喎。父母既教導方法,好直接影響仔女既性格,好多時湊仔既壓力係自己比自己,亦會間接過埋比小朋友。無關痛癢的,不妨輕鬆一下吧,對自己同小朋友都係好事呢!