advertisement

前排新聞提及小學訓練營,導師涉虐待學生的醜聞被媒體揭發。有學生抗拒參加訓練營,家長追問之下,小朋友先講出擔憂,原來因為好驚入訓練營會受罰,所以拒絕參加。然後媽媽響回條上,表明不可以要學生跪地,亦不能對學生作出任何侮辱行為,先會批准小朋友參加,同時小朋友亦可以隨時致電家長,唔可以入營後不見天日,被亂罰都無人知,令小朋友心生恐懼。

睇完呢篇報導,我覺得父母同仔女既溝通確實非常重要!父母可以點樣保護仔女,全靠小朋友主動溝通,父母先可以作出相對政策。至於點樣先可以令小朋友對自己信任,發生任何事情會第一時間想講比父母知? 呢個就係平時自己對仔女發生事情既反應,以及解決方法中培養出黎既信任關係。

當小朋友發生事情,有好多父母無深究原因,係咪都鬧左先罰左先,事後亦無解釋比小朋友知前因後果,點解係做錯。變左小朋友以後一有事,第一個反應就係隱瞞,唔想被鬧,久而久之習慣咩都唔同父母講,又或者要不停追問先會講,唔會主動向父母傾訴。又見過有小朋友只係唔小心整跌野,父母反應超大,大聲喝過去,小朋友犯錯未來得及解釋,已經嚇到目瞪口呆。繼續以咁既脾氣教仔,相信小朋友以後的傾訴對象唔會係佢父母吧!

 

 

另一種父母係,覺得將仔女交左比學校,就咩都唔需要理,只叫仔女聽晒老師話,唔聽話就係唔尊重老師,唔受教。我絕對認同學生係要尊師重道的,如果該老師係值得尊敬的話!其實唔止老師,所有值得尊敬既長輩,我地都需要尊重,呢個係做人最基本既道理,但咁樣並唔代表老師對學生做任何事情都係岩,都需要啞忍接受。學生之所以要返學,除左學知識,亦要學習明辨是非,要知道有好老師亦有衰老師,職業並唔代表一個人既人格,呢樣野一定要教自己仔女!唔好等佢覺得老師對自己點,佢都唔可以出聲,老師一定岩,講出黎父母一定話自己錯,小朋友真係咁諗既話,後果可以好嚴重!

所以仔女對自己既信任,關乎於平日大家溝通得好,仔女放心將所有大事小事都講比自己聽,即使小朋友有錯,父母亦盡量細心聆聽,幫手解決,唔好一開口就鬧,又或敷衍了事。教仔女係一件種瓜得瓜既事,落幾多心機去教,一定會收到同樣成果的!由現在起多溝通,令仔女對自己有信任,長大後關係一定更好呢!