advertisement

上一篇文章提到小朋友入訓練營涉被訓導老師虐待既新聞,引伸出一個值得討論既題目: 大人都會做錯嗎?

由於中國人太看重面子既關係,中國人傳統,長輩父母老師上司唔會有錯,錯既只有後輩,而即使長輩做錯,後輩亦唔應該當面指出。我地由細就被教導要敬重長輩父母,尊重老師,到一個地步係,佢地講既說話就係真理,佢地唔會做錯任何事。而我地做細既唔可以對佢地有些少質疑,否則就無大無細,離經叛道!

 

時代唔同了,面對社會風氣愈來愈差,大人唔謹守自己的身份去保護小朋友,甚至利用小朋友對大人既信任去傷害佢地!唔想小朋友無辜受害,我地需要教小朋友如何去保護自己。我認為最直接有效既方法,係教佢地明辨是非,自己識得分辨事情對與錯,作出相對反應!唔應該盲目相信大人所講既就係道理,要俾佢地知道,大人都會犯錯,小朋友都可以有權反抗,可以有道理的!因此父母教導小朋友時,唔可以講一套做一套,如果自己有錯,必須承認,因為身教比說教更有效。

大人無道理,同小朋友有意見時,父母可以選擇一個比較舒服既方法,俾時間自己同小朋友思考,然後同小朋友講,佢既說話都有道理,今次係父母唔岩!其實認錯都係一個正面教育,一個好榜樣,等小朋友明白做錯事要勇於承認,父母亦然。咁樣做既話,小朋友會慢慢建立自信,思考獨立,懂得明辨是非,更會主動認錯。

 

我從小教兩個仔,長輩係要尊重,但唔可以盲信,要識分辨佢對你做既事係岩定錯。佢地細個會覺得,醫生、警察、老師,呢D佢地認為係值得信任既人,必定係好人唔會做衰野,但我會提醒佢地,無論任何職業,都有壞人。正常接觸就可以,但都要提防佢地,唔可以掂你既身體,或者講一D令你唔舒服既說話,你係有權發聲拒絕,即使你只係一個小朋友。而當我睇到有D關於大人傷害小朋友既新聞,都會同佢地分享,俾佢地知道,呢D事真係會發生,大人都會做錯,所以小朋友更要懂得保護自己,做個醒目仔!