advertisement

早前同朋友傾開湊仔經,我提及大仔唔係一個好有自信嘅人,佢有成日覺得人哋好叻,自己未必做到同學仔做到嘅嘢之類。朋友聽完後,講咗一個幫助小朋友建立自信嘅方法畀我知,因為佢大女之前都係同我大仔性格相似,做事唔夠信心,都未做就覺得自己唔得,然後佢分享咗呢個方法。

 

 

~Reward System 成功獎勵計劃~

計劃目標人物:呔仔

 

第一步:立下微小目標
呢個係一個建立小朋友自信嘅 Reward System。為咗令佢哋有成功感,我哋可以幫小朋友選擇一啲佢哋其實只要努力係可以達成嘅目標,又或者一啲佢哋經常好害怕,衝破唔到心理關口嘅事。

 

講緊嘅唔一定係好遠大目標,可能只係好小一件事,就係佢衝破唔到自己的小事,都可作為鼓勵嘅目標。

 

第二步:指出並嘉許小朋友衝破障礙,達成目標
立下目標後,當然我地要不斷正面鼓勵,而呢個過程當中,小朋友真係需要付出努力,要衝破自己心理障礙,唔係兩手fing fing 咁搞掂就算,直到佢真係憑自己努力完成到目標。

 

呢個時候,我哋就要同小朋友 point out, 佢一開始覺得自己唔得,但隨住自己嘅努力、唔放棄,原來好多嘢係可能的,並唔係想像中咁難。

 

 

第三部:給予夢寐以求嘅獎勵
最後,因為小朋友自己努力得到好成果,我地可以獎勵佢哋一啲佢地平時唔易得到嘅嘢,但緊記唔可以係物質。呢個獎勵可以係帶佢外遊,係帶小朋友去一個佢想去好耐嘅地方玩,我覺得最好係付出時間陪佢去做佢想做嘅事。

 

漸漸地,小朋友會開始明白自己付出有成果,會更為下一次成功而努力,加強咗信心。呢樣嘢對佢哋長大後都好有幫助,知道想成功就要付出,而付出咗真係會有回報。

 

朋友話佢用咗呢個 Reward System 之後,大女真係明顯自信咗,做事有動力,連身邊嘅朋友都察覺到呢個轉變。

 

我都想試下呢個方法,可能大家平時都會咁樣鼓勵小朋友,但每件事講出口,同小朋友分享過程同感受嘅影響力可以好大。小朋友就是要開口鼓勵,大家加油!!