advertisement

話說我老公經常OT,以前間唔中就連續幾星期開埋星期六日唔放假,有時又會放工後晚上再開通宵。早10年仲可以,依家30幾歲的身體,同20幾差好遠,會容易累,咁捱法,真係鐵人都會倒下。

 

當年死做爛做係為世所迫的,突然結婚仲要連住生兩件,我冇做嘢全職湊仔,屋企經濟支柱就落在老公一人身上了,一個人搵 4 個人使,仲要供屋供車,確係唔容易的。捱咗 10年 8 年,啲仔開始大了,而我亦開始有時間做嘢幫補家計,錢銀鬆動咗,我近年已開始叫佢做少啲 OT,淨係返原本個 schedule好了,身體要緊。

 

而除咗身體之外,另一樣開OT的壞處,係老公少咗時間陪小朋友。而當年瘋狂 OT,老公老一輩嘅同事見狀,就忍唔住以親身經歷提醒佢:

 

「OT 錢係好好搵,但錢係永遠賺唔完的,失去咗同小朋友嘅時間,佢哋大得好快,會好後悔。」

 

苦口婆心勸告老公的同事,年輕時亦係OT王,佢好後悔當年想搵錢係咁返工,冇時間陪仔女,到佢哋大了,又追唔返失去的時間,有錢又如何。

 

老公聽完,有將佢呢番話擺上心,所以就算做野做得幾累,返完通宵 OT,都照樣同我哋出去,食個早餐又好,去超市買吓野又好,有時會癲到同兩個仔去踩單車去公園玩,就算點累都抽時間陪我哋。見到佢咁樣,其實好感激,因為做到平常爸爸本份已經唔容易,佢係比平常做得更多,好願意為屋企付出的。

 

 

 

兩個仔而家就快8歲同9歲,好多時聽佢哋提起嘅說話,係爸爸講過教導過嘅嘢。呢個時候我會覺得,原來同小朋友嘅親子時間真係好重要!唔好以為佢哋細細個,對好多嘢都無印象,就唔需要花時間陪佢哋,咁諗真係大錯特錯。

 

 

反之,佢哋會好記得3、4歲時同我哋做過嘅事,甚至當年爸爸講過嘅說話,我都好驚訝小朋友嘅記憶力可以咁強。每次我咁講,老公一定會話:梗係啦,佢哋都冇嘢記!但我覺得兩個仔記得係因為佢哋嘅童年有好多好多快樂嘅回憶,做咗好多無聊又搞笑嘅事,而呢啲快樂嘅回憶全部都有我同爸爸,2 個仔真係好幸福呢!