「放手」其實係高層次教育,引導小朋友自己作出正確決定,咁樣我哋先可以無後顧之憂地放手

我哋成日聽到,做父母要識得放手,畀小朋友走得更遠。知易行難,做父母一定想保護住小朋友,指引一條更好更廣闊嘅路畀佢哋,等佢哋行得順暢啲。

 

而對我嚟講放手嘅第一步,係教識佢哋自理,學習自己解決問題,自己負番自己責任,響放手之前,都要小朋友懂得求生技能吧!而我發現小朋友其實都幾得意,當佢哋離開父母時,例如響學校,佢哋自理能力係高㗎喎!

 

讓孩子在朋友家過夜

又好似我哋早前第一次畀兩個仔去朋友家過夜,心諗佢哋唔知搞唔搞得掂,會唔會好打搞到朋友呢?結果第二日朋友送兩個仔返嚟時,意料之外,評價甚高!

 

話佢兩個好乖仔,平時好騰雞嘅大仔仲幾有大哥風範,又有禮貌,湊咗佢哋出街成日都冇問題。我同老公聽到,都真係老懷安慰㗎!同時又證明冇父母響身邊嘅小朋友,係可以叻啲照顧自己的,冇人靠就要靠自己。

 

兩個仔 8 歲 9 歲,開始大個懂事,亦建立緊獨立思考能力。早前放聖誕假,大仔參加咗學校籃球隊,有幾日要早起返學校練習。第一日球隊練習,天寒地凍,佢起床時極不願意,仲講咗好多埋怨嘅藉口,點解放緊假都要練習㗎?點解人哋又唔使早起?真係好唔想去…

 

呔媽專欄

照常理我應該係要迫佢起身,準備佢打波嘅嘢,但呢次我選擇咗放手,將呢個決定交返畀佢。入球隊呢件事係佢自己意願,佢決定要打波的,就由佢自己負責番。

 

在旁的我,只可以解釋佢知,教練係義工家長,人哋放假都想同你哋練習,等大家打好啲,其他隊友亦珍惜每次練習機會,一定參與的。

 

如果你寧願睡覺都唔去,除咗浪費教練付出時間心機,亦證明你其實並唔係咁投入呢樣運動,我睇唔到有咩理由要繼續。除非以後唔去,咁你下次去練習時,教練問你點解上次唔來,請你老老實實回答佢,你想睡覺。大仔諗咗一陣,佢彈起身,刷牙洗面換衫,出門練習去!

 

 

佢最後決定去練波,我係高興嘅!原因唔係我講嘅嘢迫到佢去,而我講嘅都只係事實,冇任何威迫成份,我覺得我需要解釋畀佢知,件事唔係佢一個人嘅事。

 

當大家都願意無條件付出去為件事好嘅時候,點解你作為受益人,反而連起身參與嘅動力都冇呢?

 

而佢最後理性戰勝任性,懂得思前想後,盡番自己本份,就係開始對自己嘅事有交待了,呢個係我高興嘅原因,我睇到佢又成長了一點。

 

放手並非讓孩子為所欲為,而是…

常說父母應該放手,但做父母就知道,所謂「放手」,並唔係畀佢哋亂嚟,或者父母求其拋低一句:你自己決定去就去,唔去就算!

 

「放手」其實係高層次教育,引導小朋友自己作出正確決定,咁樣我哋先可以無後顧之憂地放手,哈哈。