潛移便會默化,夫妻教仔應該有默契,你賴我我賴你,小朋友就有樣學樣…

小朋友嘅性格形成,其實同我哋大人平時言行係有直接關係。早於我兩個仔幼兒時期,有個朋友好喜歡的,就算一個簡單問題,你根本冇諗住要責怪邊個,佢已經即刻表明唔關佢事,唔好賴我,甚至乎會亂咁搵個人嚟賴。

 

 

當然,好多嘢大家心知係關佢事的,但我唔鐘意係點解唔可以幫人諗辨法解決,而係要即刻話唔關自己事,或者賴落別人身上?我覺得咁冇責任感,對小朋友亦係壞,咩都推卸咗先,好自私!我哋教小朋友,錯就要老實自己認,即使唔關自己事,家人朋友有困難,都應該諗辨法幫手,而唔係置身事外。

 

父母要做好

外人可以避免少見,但家人呢?父母呢?大家有冇發現,父母之間的相處,更加直接影響小朋友性格。特別是響湊小朋友過程中,好多時父母相方一發現問題就互相推卸,你賴我、我賴你。最常見嘅係湊仔出街帶漏嘢,唔係你執㗎咩?提咗你帶㗎啦!不嬲你負責㗎喎!!

 

而其實湊仔出街帶漏嘢有幾出奇,應該體諒對方已忙得一頭煙,即刻諗辨法解決先係幫到件事,成日響小朋友面前埋怨對方,只會令小朋友有樣學樣,有事發生就即刻埋怨別人,唔會先諗吓自己有冇責任,亦唔懂得體諒。

 

再講,如果自己真係咁緊張有冇帶漏嘢,帶漏就要怪人,不如整個check list自己check好先出門口吧,講到尾問題都係響自己度。

 

而我屋企情況呢,我同老公呢樣嘢都幾有共識,我哋從來唔會為小朋友嘅事怪責對方,就算有咩安排不當,有咩甩漏,我哋都係平常心對待,唔會太緊張,反而大家一齊諗辨法解決到問題會好開心,會欣賞對方,仲加深我哋嘅感情添!

 

 

講到呢度,雖然我哋兩公婆對小朋友教育方向一致,但長輩確係令我頭痕的。如果有睇開我寫文嘅朋友,都可能知道我係點樣被湊大,對於我媽媽對我嘅寵愛,確實係不容置疑的,但方向係有少少偏離。

 

教仔方法有代溝,糾正要神速

婆婆一星期會有2,3日來過夜陪孫玩的,呢幾日我就要豎起耳仔聽吓佢點教孫,因為後果可以好嚴重,哈哈!平時唔係太過份,我都唔會出聲的,始終唔同年代,睇法有異,唔可以句句窒住咁不孝。但當我聽到佢同啲孫講,點解你媽咪唔畀返件衫你著?凍到你對手冰晒!你媽咪成日都冇啖水畀你哋飲嘅?點解你媽咪唔開定個暖爐你去沖涼?一陣冷親又點點點…

 

我想講呢,我啲仔8歲9歲喇,智力正常㗎!凍就著衫熱就除衫,呢啲基本嘢我會提佢哋,但唔係我嘅責任。佢哋住咗呢間屋咁耐,對於屋企所有嘢都好熟悉,佢哋知道邊度斟水,邊度開暖爐,佢哋係有能力照顧自己,亦必須學習自理㗎!平時婆婆嚟,佢哋好似廢人咁灘響度擘大口被餵食生果(甚有本小姐當年影子),食完成枱嘢唔執,其實咁樣已經係好唔啱㗎喇,而家仲要每件事埋怨別人,將啲責任推晒落別人身上,就真係不能縱容,我要開口教!

 

結果今朝大仔著少件衫打乞嚏,我問佢做咩唔著多件,佢話係噚晚沖涼爸爸冇拿畀佢,結果我又訓話一大輪。所以呢,小朋友你點講佢就點聽,如果家人有呢種推卸行為,真係要正視。