呔媽:小朋友做錯,唔好一時意氣衝口而出講晦氣說話,後果可能一發不可收拾

小朋友令你失望過嗎? 相信唔少父母,包括我自己,對小朋友嘅表現,或多或少會有唔同期望,有期望就肯定會有失望。每事預期,當然開心滿意,但失望時,我哋又會對小朋友有咩反應?

 

好多父母都知道,自己嘅情緒同言行係直接影響小朋友,但響我哋失望憤怒嘅時候,往往就會衝口而出一啲極具傷害性嘅說話。而呢啲說話,小朋友唔識去辨別真話定氣話時,可以造成佢哋小小心靈上好大個缺口。

 

兒子接二連三令父母失望

事情發生於一個大仔打籃球比賽嘅早上,佢唔肯起身,一直講唔想打。其實我果朝都好失望,我好怕迫人做嘢,所以一直以來我畀小朋友決定自己去向,畀兩個仔跟自己喜好而行,原因係,我要佢哋緊張自己嘅事,而唔係響隔離我一個人心急。

 

呔媽:對待小朋友勿衝口而出

 

之前講好,決定留響籃球隊,就要全力以付,打得唔好唔緊要,但我要見到你有出力,但佢竟然決定留隊後,轉頭連去比賽嘅動力都冇,我已經好唔爽。但我抑壓自己情緒,講咗好多正面嘅說話去鼓勵佢,因為我知道,呢個時候意氣用事,只會令佢情緒更差,一陣冇心機打波累及隊友,我唔想件事咁樣衰。

 

老公一句說話大仔 hurt 到爆

去到球場集合,由於大仔全程樣衰衰又冇心練習,老公忍佢唔住,開始發炮,我已經盡量開解,可惜救唔到,老公崩潰地拋下一句:點解佢會咁樣㗎?

 

我真係唔想有個咁嘅仔!我知道佢係對個仔好失望,先會衝口而出呢句說話。但呢句真係 hurt 到爆,我聽到都即刻鼻酸谷眼淚,何況係個仔,佢果刻一定好唔開心。我話咗老公兩句,就叫佢同仔練波先,有咩打完波再講。

 

世事就係咁離奇!場波大仔打得好好喎,睇到佢好盡力,防守進步咗好多,又幫到隊友進攻,就連後面個家長都留意到大仔嘅進步,埋黎同我講,阿仔防守勁咗!

 

老公見到個仔醒晒,梗係開心啦,仲係咁鼓勵佢,好明顯輸打贏要,唔係好榜樣黎㗎!但又咁講,阿仔無啦啦發力,會唔會係因為激到爸爸咁嬲,驚爸爸失望所以盡力打呢?

 

 

兒子心有鬱結飯後爆發

到果晚食完飯,講開果朝打波嘅事,大仔突然提起:其實爸爸今朝咁講,話唔想有我呢個仔,我覺得好唔開心,佢係咪講真?然後佢眼紅紅,行咗入房話要休息一陣(即係入去喊)。

 

我跟咗入房,攬住佢,解釋畀佢聽,大人有時好嬲,或者你哋做咗啲令我哋好失望嘅事,好似今朝咁,我哋有時會火遮眼講咗晦氣說話。其實絕對唔係咁意思的,只係一個情緒發洩,但咁樣係錯,唔好學。

 

之後由頭解釋一次今朝發生嘅事,令阿仔明白點解爸爸會咁講,佢先釋懷,知道爸爸講嘅係氣話。今次好好彩,個仔識自己講番感受,如果一直擺響心,變成一個心結,每次諗起都唔開心,就真係好唔抵了。

advertisement