媽媽朋友呻,流感高峰期,學校同學仔嘅父母都好自私…

今年個流感真係好堅!唔止香港,我哋美國呢邊都比往年嚴重!醫生話係因為今年流感疫苗 tip 錯菌種,所以打咗都冇咩用,大約只有 10% 防禦力,所以好多人都中招。

 

呔媽感言:流感高峰期看人生百態

 

幸運地身處美國,呢啲傳播性咁高嘅疾病,仲叫可以避免。因為地大空曠,只要 weekend 唔去人多地方,平時又自己駕車出入,如學校冇爆流感,都未必咁易中招的。但香港就唔同了,一出街已是人迫迫,巴士地鐵更係對口對面,傳染機會的確十分之高!

 

我剛剛 1 月中去過日本同香港,兩個地方都有嚴重流感,在我所見最大分別係,日本人在街上,10 個有 8 個都戴住口罩,特別是搭公共交通工具時。

 

而香港人在街上,可能 10 個只有 1,2 個人戴口罩,即使自己咳緊,或身邊有人咳緊,一於少理。

 

鄙視自私精怕麻煩畀病童返學

媽媽朋友們仲話,除咗街上人冇公民意識,學校同學仔嘅父母都好自私的,為怕跟不上學習進度,或者唔想請假照顧小朋友,病咗都照畀佢哋返學,搞到學校爆發流感。

 

又有同學中咗乙型流感都唔出聲,唔叫人防預,只為怕被歧視,思想非常病態!人民咁冇公德心,病菌又點會唔傳遍整個香港呢!

 

為咗自保,亦做個有公德心嘅人,自己病呀,人多或身邊有人咳呀鼻涕呀,就好即刻戴番個口罩喇!

 

好似我返美國果程飛機,好好彩附近冇人病,安然渡過 12 小時。但落機時我行前咗一個機倉,後面有個女人狂咳,我咪即刻戴番個口罩啦,仲要返屋企攬兩個仔,病咗惹畀小朋友點算!

 

「冇病要戴口罩」與入境員惺惺相惜

見佢咳多兩聲,我都忍唔住問佢要唔要口罩,當然佢有接受啦,成倉人望住,焗戴吧!佢話自己喉嚨敏感,我覺得點都好啦,戴啦...

 

之後我一直戴住個口罩過境,入境員斜啤問我,你病緊?我話唔係。佢好懷疑再問,咁你做咩戴住個口罩?我話因為啲人咳唔戴口罩,所以我戴。佢個樣即刻好共鳴咁: 冇錯呀!真係唔係人人有公德心,好多人咳,連口都唔蓋!

 

 

之後佢仲拎出一支巨型 3L 的捽手消毒液,問我要唔要?我梗係要啦,搭完飛機成手菌,個鼻又痕勁想捽,啱晒!

 

佢話坐響度返工,日日咁多人入境,Passport 上啲菌都唔少,幾多人隻手咳完呻完鼻涕,又摸番本簿,真係少啲抵坑力都招架唔住。

 

唔知係咪因為響果半分鐘對話,我哋惺惺相惜,佢就連報關紙都冇畀番我,蓋咗個印,唔需要搜行李,直接畀我出境。我幾高興嘅,感覺被尊重了,有人欣賞你有公德心,哈哈!