advertisement

正所謂經一事長一智,對於小朋友成長中遇到挫折,只要唔影響安危,唔係做壞事,其實我覺得佢哋應該撞多啲板。唔同嘅人生經歷,可以令人明白更多世情,呢啲係無論我哋做父母點樣講點樣教,都冇佢哋撞一次板咁有警惕性的。

 

呔仔被同學報串 讓呔媽也上了一課

 

9歲開始大個仔,識講埋晒啲話人嘅嘢,可能話人蠢呀煩呀,小學生都係講番啲小學雞嘢啦。我哋就成日教啲仔,把口要嚟講好說話讚人,唔係要嚟話呢個講果個,令人難受唔開心嘅說話,調轉自己聽到開唔開心呢?唔開心就唔好講喇,別人感覺同你一樣的。返小學,同班同學會有影響,如果有同學成日搞你,都好煩下,大仔就係咁樣,有件撞板事發生咗。

 

常提孩子要善言,不及現實的教訓

有日接佢哋放學,大仔見到我就開始喊,都喊得幾勁,我問佢係咪整親?佢話唔係,咁我就畀時間佢冷靜,返到屋企慢慢講我知。佢問我,有冇試過因為對同學講咗啲唔好嘅嘢而get in trouble?

 

我心知佢衰咩。我話都有,細個時有時講嘢唔知嚴重,都會惹禍,所謂禍從口出,亂講嘢係可以引起好大件事,所以爸爸媽媽成日教你要善言,把口要嚟講好說話。

 

之後大仔話我知,原來佢上堂時自己響張紙上面寫咗某同學名,話佢係一個「好蠢嘅光頭仔!」因為該同學成日整佢,果日仲專登想 kick 佢,所以大仔就好嬲,寫咗句咁嘢嚟發洩自己情緒。但意外地,張紙畀一個女同學睇到,個女同學就同全班講,光頭仔知道就話會告畀老師聽。雖然大仔已道歉,佢覺得咁樣話人,畀人知道,自己都唔好意思嘅,而大仔好驚會 get in trouble,所以擔心到喊。

advertisement

 

大仔怕被踢出校驚到喊

另一原因,係因為我哋成日教佢,如果寫咗啲恐嚇性嘅說話畀老師或同學,例如「我想殺你。」、「我會用槍射你。」之類,就算你只係講笑,學校都有權要你停學,響美國講呢啲說話係非常嚴重!就因為咁,大仔好驚佢寫嘅嘢會令佢停學,畀人踢出校,所以更加驚。

 

呔媽試圖解開兒子心結

了解事件後,我同大仔講,我覺得你冇做錯,因為每個人都需要搵位發洩自己情緒,你只係寫低自己對呢個同學嘅感覺,又冇走去鬧佢,冇動手打佢,已經做得好好。冇人可以控制你點諗一個人,佢做衰嘢令你感覺好差,你唔鐘意佢係好正常。我又覺得如果你寫落張紙度,寫完之後舒服咗嘅,咪寫囉,好似人哋寫日記咁,寫完發洩咗,都係一個好方法。

 

 

但除咗擺響心,你可以試下解決佢,問下呢個同學點解佢會成日整你,或者佢只係想同你玩,想撩你,但你同佢講你唔鐘意佢咁樣,叫佢要停,如果佢仍然惡意,你先去討厭佢都未遲。

 

主動向老師報告問題

我提議,如果咁驚光頭仔話畀老師聽,不如聽朝返學自爆啦,可以將件事原原本本講畀老師知,唔怕同學告狀時加減。而其實件事咁個人,又根本唔係錯事,都冇嘢好驚啦,輕鬆面對吧!結果我就陪咗大仔返學,等佢自己話畀老師聽發生咗呢件事,睇下老師點講。

 

意外地,老師話大仔做得好好,識控制自己情緒,冇因為被整而 get into a fight。

 

而老師提及咗一個重點,係我冇諗過的,佢話大仔寫嘅嘢係屬於佢私事,佢原意只係寫畀自己發洩,唔畀人睇的,其他同學唔應該望到就四圍講,咁樣係侵犯別人私隱,係好唔啱!

 

所以佢一陣會通告同學們,要尊重別人嘅 privacy,唔關自己事嘅嘢就唔好唱通街。我聽完都叮一聲,真係冇諗過美國嘅老師會有呢個諗法,真係對個人私隱呢樣嘢睇得好重。

 

然後我諗番細個返學,有幾多事情就正正因為你講佢,佢講我,大家八嚟八去引起紛爭,原來咁細個就應該教佢地,顧掂自己啲嘢先,別人的閒事不插手。最後我同老師補咗句,可以嘅話,同光頭仔同學傾傾,等佢同大仔和好,咪唔會再你啤我我啤你,大家 Happy Learning 啦!