advertisement

小朋友開始長大,進入10歲呢個年紀,突然好似明白好多嘢咁。我發現同兩個仔傾談嘅話題,已經唔同以前簡單直接地教佢哋是非黑白,依家係擴闊到討論人生意義。而佢哋嘅人生,開始滲入一啲灰色地帶,呢一點灰色,係我提供嘅,哈哈!

 

是非黑白以外 灰色地帶探索精彩人生

最緊要正正直直、自給自足

所講嘅當然唔係教佢地不分是非,而係響教導佢哋正確人生路嘅同時,想畀佢地知道其實人生係好好玩的,有無盡嘅選擇,只要係不損人又利己的,你可以自己決定。我同老公教仔態度比較開放,對仔嘅期望就係正正直直做個好人,長大後能夠自給自足,最好就寓工作於娛樂啦,叻仔的話,有能力就多幫助有需要嘅人,總之開開心心,唔好浪費人生。

 

好似同兩個仔傾開關於生活上嘅問題,大仔問我,媽咪你有咩係最最最唔鍾意做? 其實我知呢個時期,我係一個點樣嘅人,我嘅答案對佢影響好大,但我決定老實答佢,我最唔鍾意做家務,唔鍾意洗衫煮飯執屋。大仔個樣好驚訝,吓? 真㗎?但你煮飯好食喎!(佢地要求好低的,加上唔鍾意都煮咗咁多年,係熟能生巧) 我回答,唔鍾意唔代表會做得差,有時你唔鍾意嘅嘢,去克服佢挑戰佢,都係對自己一個磨練嚟嘅!(我一有機會就教仔㗎喇)

 

之後仔問,咁你以前係點㗎?未有我同細佬之前。我又好老實咁答,細個我唔煮飯㗎,出街食或者去朋友屋企黐餐囉,我連水都唔煲㗎,樓下買一支支嚟飲。我果時兩個星期請一次家務助理嚟執屋打掃,洗衫洗被舖就落樓下磅洗,咁你知我幾唔鍾意做家務喇。

 

 

「原來媽咪細個咁懶!」

仔聽完有啲驚嘆,佢地唔知原來「家務」係可以假手於人,因為咁多年來佢哋見到嘅都係媽咪一手包辦,冇諗過可以有呢啲選擇。然後,佢地講咗句,原來媽咪細個咁懶!就係因為呢句說話,我決定要好好咁解釋佢哋知,呢個世界,係有選擇㗎仔!

 

自問我從來唔係一個懶隋嘅人,高中時期,即使屋企冇經濟困難,阿媽仲比緊錢我使嘅時間,我已經係上晝返學,下晝去做 part-time 的,因為我覺得返半晝學,功課又少(美國係咁),剩低果半日要嚟 hea 太浪費人生。到大學時仲癲,因為堂與堂嘅時間好騎呢,我就響學校一份 part-time 要嚟 zip 時間,放學同 weekend再補多份。

 

當年好激㗎!做接線生幫醫生聽病人緊急電話,幫人頂 overnight shift,第朝直踩返學,又一路返工一路打論文。如果要我講我做過嘅 part-time,我諗口噏噏都講到 10 幾份。到出嚟做嘢,我經常同阿姐 OT,可以到晚上 11,12 點,係公司最遲走果幾個。原因唔係公司迫 OT,多數係我自己想做埋啲嘢先走,其實我真係好鍾意做嘢,但只限做自己鍾意嘅嘢。

 

人生可以充滿不同的可能性

同仔講完呢啲,我再問,咁你覺得呢個媽咪又係咪懶隋呢? 咁佢地又話我好勤力喎!就係喇,媽咪就係想你哋知道,每個人都可以有唔同嘅喜好,唔同選擇。我願意花錢請家務助理來打掃,願意花錢去磅洗,呢啲係我嘅選擇。但你又諗吓喎,我啲錢點樣嚟呢?係我努力工作賺番嚟㗎喎!換句說話講,我只係選擇用打掃嘅時間去工作搵錢,然後將工作嘅錢付比嬸嬸幫我打掃。即係如果打掃同返工薪金係一樣的話,我只係選擇咗返自己份工。

 

我所指嘅灰色地帶,大概就係咁樣。其實我可以一貫口吻教仔,洗衫執屋呢啲咁容易嘅家務,梗係自己做啦,點可以咁懶㗎!但事實我又覺得,每個人都可以有自己選擇,只要你搵到其他嘢去做個平衡,就冇問題了。

 

仔開始長大,都想佢地明白到,生活係可以有好多可能性,你有能力的話可以選擇生活方式。想過自己鍾意的,就努力地生活吧!