呔媽 Kelly|做好心理準備,ready面對大細仔青春期

 

接近10歲年紀,兩個仔愈嚟愈有自己嘅思想態度,老老實實,對於青少年必經嘅反叛期,我係又驚又喜的。因我知道唔容易,應該比教小朋友更大挑戰,我有點興奮期待,但又驚自己帶錯路。

呔媽 Kelly|做好心理準備,ready面對大細仔青春期

湊仔快10年,一直我好少睇人哋點教,因為我覺得每個小朋友性格唔同,大概只有父母自己先最清楚小朋友需要點去教育。我一直以身教去教導小朋友,用自己把尺去教其實冇難度,我用甚麼態度去生活,去對人對事,佢哋自然有樣學樣。兩個仔亦預期哋做到我哋要求嘅野,總算品行良好,善良,亦會為別人着想。

 

兩個仔暫時仍然係好孩子,佢兩個自己參加活動,導師都讚佢哋守紀律,有禮貌。啲仔乖,我當然開心!但我明白,亦開始叫自己接受,呢個年紀嘅小朋友係時候開始建立自己一套價值觀。佢哋開始有自己思想,亦會用不同方法去證明自己可以做決定,呢個係成長必經過程,而且對將來做人處事好重要。

 

因此,對於佢哋開始表現自我,會挑戰我哋講法,識得反駁佢哋覺得唔合理嘅事情,我抱正面思想的。我覺得對應青少年成長,自己應該保持開放態度,老套但真係最有用嘅,係多溝通,多傾計。我會同兩個仔講,你哋可以有自己諗法,可以表達意見,大家可以討論,而討論最重要一點係: 無論如何,態度要好!係我哋同小朋友嘅態度都要好!因為討論時,如其中一方態度差的話,根本就冇可能再講落去,你燥我又燥,只會黑面收場。

 

 

自己都經歷過最恐怖嘅青春反叛期,我有認真諗,我希望自己可以用一貫平靜嘅態度,去陪佢哋度過呢個重要嘅成長時期。諗番當年父母畀我哋嘅抑壓,霸權式教育其實一啲都唔work,只會令仔女反感,有能力時更反叛。相信大家最怕嘅係,父母一開口就鬧,一開口就哦,我哋做咩都唔順眼,咩都話唔好唔得!

 

我哋自己都知有幾討厭,希望到時教仔,我可以代入多點,諗到佢哋諗咩,可以避得開唔做呢啲厭惡性行為,希望兩個仔嘅青春反叛期,我能夠大步檻過啦!

advertisement