呔媽專欄|迫小朋友學琴邊個係輸家?

做人父母甚艱難!難在唔係供書教學,唔係供食供住,將佢哋撫養成人。係難在自己心入面嘅爭札,好多時要決定用咩原則教導小朋友,唔知自己做得啱唔啱,好怕原來自己果套到最後會扼殺咗小朋友將來嘅成功。

呔媽專欄|迫小朋友學琴邊個係輸家?

一片苦心迫下佢哋好唔好?

好似有啲位,我會諗如果我進攻啲,迫一迫佢哋,其實會唔會係好事呢? 小朋友其實係咪需要大人推動,而唔係想做就做,唔想就算呢? 如果我依家冇咁做,第時我會唔會後悔呢? 當然,所有嘢都係一個未知,冇人會知佢哋長大後嘅際遇,冇人會知佢哋嘅性格夾埋我哋嘅教導,將來會有幾大成就。

 

有時諗到呢度,我就覺得,不如畀個開開心心,輕輕鬆鬆嘅童年佢哋,第時係點都好,至少童年係非常愉快的。唔知你哋又有冇呢啲矛盾想法呢?

 

迫小朋友學琴有用?

近排睇咗一篇報導,內容大約係講一個女仔,佢媽媽從小迫佢學琴,其實佢好唔快樂,但為咗唔想媽媽失望,亦知道學琴唔平,每次都扮開心咁去上堂。件事聽落好平常,大人迫細路做唔鍾意嘅事,時有發生吧,但當我認真去思考呢件事,我覺得真係一個雙輸嘅行為。

 

錢用咗,可以當係換咗啲成績番嚟,但時間冇咗,快樂冇咗,呢啲係完全冇得挽回的,為嘅就係媽媽覺得女仔學琴有用,學琴感覺好高級,又或是一圓自己小時候嘅夢想。有時候大人一心想為小朋友好,會一頭栽進,迫佢哋做呢樣做果樣,結果可能令父母滿意,但小朋友呢,就經歷咗一個不太愉快嘅童年。

 

 

珍惜無憂童年

小朋友一直扮開心做自己唔願意嘅事,其實都係一個幾大嘅童年陰影,甚至影響成長性格。小朋友亦會因不敢表達自己感受,而同父母關係疏離的。如果父母唔聽意見,堅持己見,小朋友冇權選擇的話,往後嘅日子佢有事都唔會攤開討論,免得又被打壓。自己都經歷過,細個明知父母唔會聽,唔會理解嘅嘢,情願唔出聲收埋,冇謂多生事端有排煩。

 

諗下小朋友讀書嘅日子,其實就係最輕鬆最快樂,最多機會同時間去做去學自己鍾意嘅嘢。畢業後出嚟社會做嘢,為生計又好,為理想又好,日日都在拼搏,仲邊有咁多閒情可以滿足自己興趣? 既然如此,倒不如趁呢段毫冇負擔嘅時間,畀小朋友自己決定鍾意做啲咩,支持佢哋。

 

學咗嘅嘢第時有冇用,未到果刻都冇人知,可能會係佢哋其中一個成就呢!但冇論將來係點,至少賺了現在嘅開心,賺了同仔女溝通,仔女對自己嘅愛,懂得互相尊重,呢啲都係冇價寶呀!

 

advertisement