呔媽Kelly|教導孩子要耐性! 見到「米雪」都唔嬲進入了化境

之前寫咗一篇關於細仔被同學偷螢光筆事件(link),share咗去自己Facebook Page(link)比網友們閱讀。大家留言都好錫細仔,提醒佢快啲寫番個名落自已物件,唔好再畀人偷嘢,亦支持我處理方法,教細仔解決事情,同時保留佢寬容之心。

 

呔媽Kelly|教導孩子要耐性! 見到「米雪」都唔嬲進入了化境

其實小朋友每次有事發生,都係一個好好嘅教育機會。我哋點樣去處理事情,說話想法,所有嘢佢哋直接入腦,係身教。平時講幾多教幾多,都唔及解決事情時你作出一個反應咁有影響力。

 

做父母後,我開始知道三思而行,唔係誇張,而家講句嘢都先諗下會唔會教壞細路。有時衰聲講咗句嘢,下一秒已經後悔,提自己應該換個友善嘅說法,因為對仔會有樣學樣。為咗對仔,我每日都學習做個更好嘅人。

 

玩到成屋米 忍住唔發火

其實我燥底,性格又心急,但響湊仔嘅過程中,我發現原來我代入佢哋,將自己變成小朋友,我好自然會企響佢哋嘅角度去諗,望所有嘢都係快樂,都係童真,我湊佢哋湊得好開心!好似佢哋3幾歲時,玩到親戚屋企成屋米,兩隻嘢仲好開心拉我出廳睇落雪!我一行出廳,見到想暈,因為之後約咗人趕住出門口,唔係自己屋企唔可以返嚟先執,真係燥燥哋。

 

但我當時心諗,佢哋玩得咁開心,仲拉埋我分享快樂,如果因為我心急,我開口大鬧,成件事就搞挎了,加上望到佢哋咁天真,笑到見牙唔見眼,點會捨得發佢哋脾氣呢?結果我同自己講,唔玩都玩咗喇,由佢哋開心下啦!

 

之後,我仲同佢哋一人一個信封,鬥快剷番晒啲米埋一堆,快快手清場出門口。事後,我有教番佢哋,唔可以咁樣玩,除咗要自己執手尾善後,又浪費食物,啲米溝埋哋下嘅塵同細菌,唔食得了,種米好辛苦的,另加 Youtube 種米收割短片助教。

 

只氹不教手尾長

又有次同佢哋搭哋鐵,細仔好細個,2歲咗右,到尾站唔肯落車扭計,趕住關門時我一手抱起夾咗佢落車,佢一路喊,我就同佢企埋一邊,等佢慢慢喊,我又冷靜下自己。因為個情況都幾狼狽,我推住BB車,又拖住3歲大仔,又夾住爆喊細佬,又多人望住我。都喊咗好耐,我一直陪佢企,等佢冷靜落嚟,我問佢點解要扭計,佢話唔想落車,咁我解釋咗點解要落車,同埋佢咁樣唔合作會令媽咪好狼狽,甚至會發生意外。

 

講完一輪,佢知道錯,有同我道歉。朋友話呢啲情況,其實響車箱入面時,一個雪糕一包糖已經可以引開佢,解決咗。我知好多父母會用呢招,但我覺得呢個方法好伏。冇錯係即刻解決咗唔使煩,連教都唔使教添,但留低咗個好大嘅後患,係一個鼓勵小朋友扭計嘅方法,所以點解小朋友咁鍾意扭計呢,大人教的,扭計發脾氣就會得到好處。

 

 

有時我哋激動,係因為以為小朋友專登同你鬥氣,專登唔聽你講,先入為主地覺得佢哋挑戰自己,但其實當你願意花時間去了解佢哋,佢哋只係用另一種方法去表達自己。年紀較細嘅小朋友,其實好多時都係以快樂行先。佢哋覺得好奇,好得意,好開心就會去做,後果係我哋負責去教,仲可能要教好多好多次,父母嘅就係咁樣訓練番嚟。我哋忍得到唔發癲,佢哋自然跟章,唔會用脾氣對抗父母,我哋以後就有好日子過。

 

而比較懂事嘅小朋友,我覺得可以多點同佢哋傾偈,引導佢哋講出自己感受,比佢哋一個正常發洩渠道,父母用心聽,令小朋友釋懷,可以減少行為上偏差的。

advertisement