advertisement

隨著兩個仔年紀漸長,佢哋問嘅「點解?」就愈來愈多。而呢個「點解?」,除咗係一種求知慾外,亦係佢哋追求公平嘅一個方式。

 

呔媽專欄|珍惜孩子問「點解?」後的解答機會

由小時候開始,佢哋已經好鍾意每事問,我覺得佢哋幾幸福㗎,因為佢哋有個好鍾意講道理嘅父母。佢哋不停發問,我哋不停回答,聽道理長大嘅小朋友,係會比較生性及懂事的。其實講道理都係一種習慣,咁多年,我哋已經習慣咗解釋每件事,佢哋亦習慣了聽道理,唔明又會立即提問。我哋屋企咩都可以講,經常嘻嘻哈哈,暢所欲言,我最希望係keep到佢哋長大後都一樣,事事同我哋分享。

 

「點解?」其實係想要求公平對待

 

兩個仔9歲10歲,佢哋而家問嘅「點解?」,多數係尋求公平。每每我哋大人作出一個決定,佢哋一定會問「點解?」。點解大人做得,我哋唔做得? 點解會話唔好,會反對? 點解要跟你哋嘅方式? 點解同學都咁咁咁,我又唔可以嘅? 佢哋就係藉著呢一堆堆問題,建立自己嘅價值觀,學習點樣去做正確決定。

 

因此,我哋做父母,最緊要捉住呢啲機會,認真講道理,對!趁佢哋仲肯聽時,我哋真係要好好去講。我最鍾意見到佢哋聽我講道理個樣,好似我講咩佢哋都信咁,哈哈!

 

 

 

Hea答已經好難過骨

 

依家佢哋嘅思想,唔再係同細個果時咁簡單。同佢哋講道理,真係要好有道理,好講得通先得。好似佢哋想嚟緊新學年,參加學校嘅交通小組,負責朝早同學們返學時,安排Drop-off Zone嘅交通上落車,幫家長開車門,接小朋友落車,打下交通手勢之類。重點係,佢哋要一早返到學校準備,而我係勁唔想早大半個鐘起身送仔。

 

起初我有話唔想,佢哋問點解? 我就同佢哋講出我嘅苦處,平時要湊佢哋,屋企大小事務洗衫煮飯,佢哋打波游水我又要做司機跟班,再做埋手袋生意,睡多果大半個鐘對我嚟講好重要㗎,我已經長期渴睡。

 

之後大仔話唔緊要,佢可以早一個半鐘起身,跟爸爸車返學校先,我就可以繼續睡。我聽完,覺得佢真係好想參加,寧願早個半鐘起身都唔想放棄機會,確係令我老懷安慰嘅!

 

既然個仔會為自己想做嘅野,去爭取去付出,我就成全佢哋,早起就早起啦!我又有同佢哋講返,媽咪願意付出,係因為我感覺到佢哋對件事態度認真,亦希望佢哋可以從中學習。我覺得批准又好,否決又好,每個決定都解釋比佢哋知,慢慢佢哋會學識好多做人嘅道理,畢生受用。