呔媽專欄#217|不能讓小朋友扭計得逞!

兩個仔從小就習慣跟住我同爸爸四圍去,唔單止我覺得湊佢哋係件容易事,連我老公都係湊仔高手,佢經常一拖二同兩個仔去玩,甚至三父子開7個鐘車落L.A.都冇問題。

 

朋友話佢哋易湊,好少扭計,又唔會亂發脾氣,帶住佢哋梗係容易啦!但冇小朋友係天生乖巧有禮的,一切都係在於父母教育,想往後日子過得輕鬆,就要從小堅持自己一套教育方式。

呔媽專欄|不能讓小朋友扭計得逞!#217

 

教仔各施各法無分對錯

點解話係自己一套呢?因為同其他媽媽朋友相處過,發現其實大家對小朋友嘅教法可以好唔同。我心目中覺得好,覺得正常的,其他人眼中可能不一樣。見過有媽媽,會教小朋友唔好執輸唔好蝕底,教小朋友顧咗自己先,咁先叫做醒目。

 

我哋就教兩個仔禮讓,人哋有需要就畀人哋先,有事發生即刻幫手,咁先係男仔所為。你話佢教小朋友唔執輸係唔啱嗎?又唔一定,只係大家對自己小朋友有唔同期望吧!所以教小朋友就睇自己接受能力,自己教出嚟嘅,激親自己就好搵笨。

 

兩個仔易湊皆因明白事理

呔媽專欄|不能讓小朋友扭計得逞!#217

小朋友易湊,係因為佢哋會明白大人為自己安排嘅事,容易妥協,唔會咩都同父母拗一餐扭一餐。其實要教小朋友唔扭計,真係一個幾大嘅課題。

 

因為我想要嘅,係兩個懂事嘅小朋友,並唔係想佢哋怕咗父母,唔敢出聲先叫乖。我覺得高壓政策禍害深遠,到佢哋大個有能力反抗時,壓力爆發,會黐線哋反叛!

 

 

眼見唔少朋友的仔女長大,開始步入青春期,大家變得更難溝通。所謂種瓜得瓜,如果父母平時冇耐性,日鬧夜鬧,唔講道理的話,佢哋大咗就唔會再聽你講了。

 

印象中,兩個仔懂性以來好少扭計,更唔會亂發脾氣,甚至打人。呢個我覺得係因為我同佢哋從小講道理,1-2歲已經開始講,記得當年,唔少朋友疑問,真係有用?咁細個都識聽?當然啦,佢哋識回你反應,就識聽你語氣態度了。有意見時,我哋會討論情況,互相尊重(懂性時),作出一個滿意決定。

 

讓扭計成功後患無窮

我覺得最重要有一點必須堅持,係比小朋友知道,扭計發癲並唔會得到佢哋想要嘅嘢,唔會去做佢哋想做嘅事,即使果件事佢哋有道理都好,扭計等於自掘墳墓,冇得傾。

 

由於未試過扭計成功,亦知只會帶來反效果,因此佢哋係唔會用扭計呢個方式去表達訴求,佢哋學會同父母講道理。

 

我哋面對初初想用扭計得逞嘅小朋友,係要堅持,認真同語氣平靜。見過唔少父母,小朋友有不合理要求,佢一開始就好嚴厲話唔得,小朋友一扭一喊就好啦好啦,咁你就知道點解個小朋友鍾意扭計了。

 

 

advertisement