advertisement

又一個新學年開始,做父母最緊張,一定係自己小朋友嚟緊今年嘅老師係個點樣嘅人。對足成年,會想知係咪一個好老師?會唔會教得好自己個小朋友?

 

我兩個仔今年讀小三小四了,返學好幾年,我同意除咗自己努力教之餘,學校環境,老師同學,都係直接影響小朋友性格形成,所以我好緊張佢哋學校嘅人事。幸運地,由入學到依家,遇到嘅都係好好老師,每一個都好有愛心,特別是我大仔性格獨特,唔係一般人喜愛的情熱討好小朋友,又有輕微抽動症,所以佢需要更多嘅愛同耐性去包容教導。

呔媽專欄|開學發生「衰老師驚魂」好在係虛驚一場

同班同學突然抗拒上學

今年開學,大仔果班就發生了「衰老師事件」,好彩只係虛驚一場,而事件亦令我同眾網友們有所得着。事緣剛開學不久,我收到大仔同學家長的一個電話,內容係佢發現佢嘅小朋友突然好唔鍾意返學,傾談中投訴班主任對學生態度不禮貌,冇愛心又冇耐性兼為人暴燥。聽完電話,我問大仔係咪真有其事,因為大仔一直有話老師好嚴格,但冇提及態度問題。

 

大仔話老師的確好嚴厲,好似佢做得慢或冇留心,老師就會企響佢隔離啤住佢,此舉令佢好驚又緊張,其實更加集中唔到。而其他同學媽媽嘅投訴,大仔就話佢接受到,惡得嚟都覺得老師係錫小朋友的,感覺並唔係太差,只係唔鍾意老師一直啤住佢。

 

咁究竟我係應該直接搵老師解決,抑或教小朋友自己消化呢件事?習慣幫小朋友出頭,又係咪好事呢?做父母就有呢啲矛盾位,有事發生時點樣去取平衡?

 

呢件事我一直同大仔一齊去商量,一路問佢意見,從同佢傾計中我會知道佢對老師嘅感覺係點樣。當我同佢講,我想e-mail老師睇下佢可唔可以用另一個方法去教,唔好怒啤,但大仔知道有可能會被叫出去討論事件,佢就話咁樣仲驚過畀老師啤,禁止我發e-mail聯絡。咁我又覺得,不如等多一星期Back-To-School-Night先直接同老師傾下,面對面大家講得清楚。

 

被不尊重對待要即時反抗

另一方面我教大仔,如果受到不尊重不禮貌對代,無論對方係邊個,老師又好醫生又好,甚至父母都好,小朋友係需要即時反抗!因為冇人可以因為任何原因去傷害另一個人,身體上或心靈上都唔可以!

 

我希望佢知道就算係小朋友,都有權保護自己,並唔係小朋友就要啞忍受傷。以前父母冇教我哋呢啲,我哋就只知道:在家要聽長輩話,返學要聽老師話!結果好多黑暗童年出現,事實大家對小時候嘅不快,係會記一世。

 

 

因此我一直教兩個仔,雖然大人經歷多,我地可以教你好嘅事情,令你人生路行得順啲舒服啲,但要記住我哋每個人都係平等。我哋只需要尊重「懂得尊重別人嘅人」,無論對方係咩身份。大仔聽完,鬆一口氣覺得冇咁驚了,但好奇原來小朋友可以以下犯上。其實在我立場,只要你有道理,為何不可?

 

結果Back To School果晚,同老師接觸過,傾咗一大輪,我發現完全同同學媽媽投訴嘅係兩回事。我亦四出打探呢個老師師資及性格如何,每個人都大讚佢非常用心教學,好肯花時間預備課堂,經佢教出嚟嘅學生有禮貌有學識。雖然十分嚴格,但出心出力為小朋友好的。

呔媽專欄|開學發生「衰老師驚魂」好在係虛驚一場

聽完其他人講,加上我自己同佢對話嘅感覺,我覺得呢個老師好好呀!仲幾適合hea足咁年嘅大仔添!我亦發現學校專登安排所有hea嘅同學都入咗呢班,其實老師都辛苦,要用9個月精神時間去軍訓呢班唔自覺嘅細路,我覺得好偉大喎!

 

呢件事令我學識咗,唔好跟車太貼!哈哈!除咗直接搵老師解決問題,更重要嘅係,點樣令自己小朋友內心強大起嚟 ,勇敢面對自己覺得有問題嘅事,克服恐懼,小朋友先至畢生受用!

 

何況學校就係小型社會,甚麼性格嘅人都有,除咗改變別人,更有效嘅方法係學習如何身處亂世中,仍能心態安然地過活吧!