呔媽專欄#219|教養孩子要忠於自己勿理閒言

我信奉快樂,我覺得無論做咩都好,個過程開心係最重要,而快樂地完成一件事,結果大多係滿意的,就算有偏差,但至少快樂過。由開始陀 BB,到依家教養小朋友,我都係本住呢個「快樂宗旨」,湊住只相差一歲嘅大仔細仔,一手一件,唔覺得辛苦,反而好享受左擁右抱嘅時光。

呔媽專欄#219|教養孩子要忠於自己勿理閒言

快樂來自「忠於自己」

試過佢哋 2 歲 3 歲時,一個人帶佢哋飛10幾個鐘返香港,佢哋好易湊,我覺得係因為我嘅開心感染到佢哋,哈哈!

 

好多網友問我,點解可以成日咁開心,諗嘢咁正面,我諗我嘅快樂,係來自忠於自己。做自己覺得啱嘅事,就最開心最舒服啦!點樣可以忠於自己? 咪就係唔會理人講咩,唔會畀人影響,呢個都幾係我做人宗旨。

 

我意思,唔係話要完全唔理人哋講嘅嘢,而係你唔需要因為人哋講嘅嘢而過份影響自己想法。

 

好似由陀BB一刻開始,你身邊嘅親友,有生過或者冇生過 BB 嘅,都會化身醫生護士,話你知點樣陀係最好,唔好做呢樣唔好做那樣。

 

有網友同我呻,佢陀BB後,奶奶不停話呢樣唔好果樣唔好,連食杯雪糕都要匿埋,成日畀人監視,做咩都話會影響 BB,好大壓力,好唔開心。

 

雖然家人係好心提醒,但有時好心做壞事就係呢啲,BB 都未出世,個阿媽已經抑鬱症!我覺得可以同家人講出自己諗法,爭取下堅持下,始終陀 BB 係自己,成個孕期開唔開心好重要,BB出世易唔易湊,都係受媽媽陀BB時嘅快樂情緒影響。

 

父母才是最明白孩子的人

呔媽專欄#219|教養孩子要忠於自己勿理閒言

到湊仔喇,最常見周邊閒人會評論你小朋友,高矮肥瘦呀,有冇禮貌之類嘢,咁呢啲小事一笑之置啦,除非你自己本身都覺得有問題,就去處理,去管教。別人嘅意見,你可以過濾後再作決定,因為只有你先知道自己小朋友有冇問題,應該點樣教育。

 

我聽過無數網友們話老師親友等等,責怪自己小朋友唔叫人係冇禮貌,但其實小朋友只係怕醜慢熱,呢啲事好影響父母心情,好困擾。我就覺得只要你自己知道小朋友唔係冇禮貌,而小朋友最想得到嘅亦只係父母嘅明白同體諒,我哋畀適當鼓勵已經足夠。

 

外人明唔明白,我覺得唔重要,甚至我睇法係,你連少少耐性都畀唔到小朋友,都唔會去了解小朋友性格,一開口就責怪,你品德又幾好呢?

 

 

 

到在學途中,又會有好多人化身教育界,同你講讀咩好呀學咩好呀。最搞笑有個網友,佢話同學阿媽會話你幫小朋友揀果啲係冇用!

 

學得開心同鍾意係冇用!!呢個時候,「忠於自己」呢四個字真係好好好重要,因為你小朋友嘅快樂童年就響你手上,你一時迷失,聽左同學阿媽講果套,迫小朋友學啲佢哋唔鍾意唔享受嘅嘢,你嘅小朋友就會由天堂跌落哋獄。

 

呔媽專欄#219|教養孩子要忠於自己勿理閒言

當然,大家都想小朋友開心之餘又學到嘢,我覺得可以安排唔同科目畀小朋友試堂,睇下佢哋鍾意邊樣,又可教佢哋要對自己嘅選擇負責任,自己鍾意的就唔好咁易放棄。

 

其實做父母都係一種磨練,有番咁上下年資,自然冇咁容易畀人影響,而懂得放下別人嘅說話,忠於自己,人生就過得更快樂了。

 

 

 

advertisement