呔媽專欄#226|家長日後感言

一間學校好唔好,除咗整體學術分數高之外,我覺得更重要嘅係老師教育方針,同埋處理小朋友各樣問題嘅心態同方法都好重要。因為老師嘅教育方式,係絕對會影響埋家長對子女嘅教育。常常聽到香港嘅朋友們,會話老師畀小朋友好大壓力,好難先遇到會體諒小朋友嘅好老師,唔好話鼓勵,唔踩已經好好。而小朋友一到家長日就好驚,因為父母聽完老師一輪投訴,實會被大罵一番。

呔媽專欄#226|家長日後感言

做錯唔記過 要寫Thinking Sheet

美國呢邊教育比較人性化,先唔講家長日,就講平時我兩個仔做錯事,學校會畀一張Thinking Sheet,內容大致係通知家長,小朋友做咗咩錯事,小朋友要寫番點樣改善,家長簽名後交回學校。呢張嘢正常嚟講,小朋友拎到返屋企,梗係比父母鬧了,但老師在學期開放日時,就重點提醒各家長,張Thinking Sheet不是用來鬧仔的,係要嚟同小朋友一齊去討論,點解會咁做?點樣去改善?只懂懲罰,係幫唔到小朋友思考反省,只會令佢哋更反叛,做更多錯事。我聽完,感覺好好,好鍾意呢個老師嘅教育方向。

 

到小朋友好驚驚嘅家長日,諗起其實細個自己都好緊張,覺得梗係有嘢畀老師話,然後返到屋企又梗會畀媽咪「哦」一輪。而上星期嘅家長日,老師們當然有同我討論兩個仔響學業上面及品德上要注意嘅事,大致係上堂心散不專心,掛住同隔離位傾計,都係啲細路嘢,不算好意外。其實家長日對我嚟講,我比較想知響我完全唔理佢哋做功課呀,又完全冇同佢哋溫習嘅情況底下,佢哋學業上有冇咩問題,會唔會跟唔上。好老實,我好着重佢哋品德,又好緊張佢哋要運動,但學業成績我只求中等。佢哋平日放學,就是打籃球游水,從未額外補習。我覺得瘋狂補習呢樣嘢都幾黑人憎,人哋明明教緊加減,你要識埋乘除,係咩心態?

 

家長日後勿斥責

然後臨走前,老師又提到,返去唔好鬧佢哋,慢慢同佢哋講番有咩要改善,等佢哋明白家長日係一個老師同父母溝通嘅機會,並唔係投訴日。對於我呢種唔太着重成績嘅家長,其實我想法同老師一樣,只會同佢哋討論番響學校要注意嘅事情,點樣可以做得更好,學習更專心。而我同佢哋討論嘅開場白,係老師都幾滿意你哋響學校嘅表現,有留意你哋有畀心機學嘢,不過就要專心啲唔好傾計...(下刪數百)總之係要畀佢哋覺得老師係錫佢哋的,只係對佢哋學業態度有要求,希望有改善做得更好!同埋老師咁有心改正你嘅錯處,就更加要畀心機,唔好讓老師失望吧!

 

 

將心比己,如果一開口就話老師點樣點樣投訴你,小朋友一定會唔開心,覺得老師原來咁唔鍾意自己,以後對住老師會有芥蒂。佢哋關係好,小朋友鍾意老師,對上課學習都有一定幫忙的。

 

 

advertisement