- motherhood
- by 呔媽Kelly
- 14/11/2018
湊小朋友原本就係一個大挑戰，如果湊着個同自己完全唔同性格嘅，好似我大仔咁，我直情覺得呢種挑戰係放大咗100倍！因為呢個已經唔單止係填飽佢個肚，同陪佢玩咁簡單，而係我要變成另一個人，用另一種思想去了解佢，去代入佢，其實，有時都會累。細仔唔同，佢非常知性，問題好易處理，變咗我好多心機唇舌，都係花響大仔身上。
早前大仔10歲生日，老公製造咗個大驚喜畀佢，book好酒店租了車，一家人去環球影城玩，4日3夜，預備當刻先話佢知。正常小朋友生日有得去玩，實開心到爆！但我大仔呢，偏偏相反，係極度唔願意話想返屋企，之後仲喊到收唔到聲。老公見狀，大感失望之餘又忍不到脾氣，憤怒大鬧，可能自己付出心機，駕車來回14小時都唔怕累，只為給大仔一個難忘10歲，可惜事與願違，其實真係好難受，果刻我都想喊。而我同細佬當時就只有兩個字，無奈！我唯有一邊控制老公情緒，又一邊安慰大仔，等佢哋兩個都冷靜落嚟，先可以繼續旅程。
混亂中，我記得自己非常強調呢一句：「幾嬲都好，唔好講啲傷害性嘅說話！記一世㗎！！」其實唔只對小朋友，同伴侶又好，家人朋友又好，好多嘢鬧咗出口，唔係一句對唔住就冇事，即使明知發洩說話，但多年後仲會隱隱作痛，所以我唔鍾意發癲鬧交。對於情緒控制，我另一個諗法係，經驗話我知所有嘢響幾分鐘後冷靜落嚟，其實都只係小事一樁，咁又有冇必要去為咗呢刻火一火而互相傷害呢？
仲要喎，如果係為咗教仔而激動，你要知道無論你激動幾多次，打鬧幾多次，佢哋都仲會有下次㗎喎！咁你又諗喇，既然咁激動都唔會有咩大幫助，不如響一個和平嘅氣氛慢慢教，仲有效益吧！
我記得當然我不停重複呢句：冷靜啲，好小事！如我所說，大仔唔使10分鐘，冷靜落嚟，同佢逐樣化解咗佢嘅不安，已經笑晒，好ready去享受呢個旅程。諗番轉頭直情係好似鬼上身咁㗎，佢都話唔知自己點解喊得咁勁，可能係太突然，好多嘢擔心。老公又話好彩我響度控制場面，覺得點解我可以咁冷靜，好似冇感覺咁。
我想講，我已經做咗媽媽10年了，如果我樣樣嘢都放到咁大，事事發癲激動，我諗我好快冇命。嚟緊佢哋青春期，大把嘢等住我嘆，我要繼續好好修行，要保持好情緒去接受佢哋挑戰我，哈哈！