呔媽專欄#231|如何對付擔心仔?

兩個仔開始大個,我同老公亦逐漸重獲自由。年頭試過請奶奶幫手照顧佢哋一個禮拜,我同老公拍拖去東京玩,係有小朋友之後,第一次擺低佢哋,自己去玩。由於實在太開心太過癮喇,我哋決定嚟緊1月又再拍拖旅行。今次又大一年,應該就更冇問題啦!點知我果個咩都擔心一餐嘅大仔,又畀難題我喇,好彩經爸爸耐心教導,佢又OK了!老公真好,有佢響度,慳咗我一半口水,哈哈!

呔媽專欄#231|如何對付擔心仔?

話說今次都係同老公去一個禮拜日本,但之後我會再留港幾日。第一個禮拜奶奶可以幫手照顧,之後老公就自己湊,返工之餘,又接送上學。為免大家趕頭趕命,我哋1月就決定畀兩個仔去after school program。呢個program其實好開心的,細仔一路想去,因為3點放學就直接去canteen做功課,然後有埋茶點,再同同學仔recess玩,6點前接走就可以。而咁多年都冇畀佢哋去,因為我響屋企工作,我可以3點接佢哋放學,就想自己教番佢哋做功課,及整下午茶佢哋食,唔使又食學校啲 fast food。

 

要相信一切都會變得美好

呔媽專欄#231|如何對付擔心仔?

唔係生兩個仔,都唔知佢哋咁唔同嘅!我一講話嚟緊1月佢哋可以去after school program,細佬即刻Yeah晒,大哥就谷眼淚話唔去,之後就激動喇!又話未去過,又話唔知係點,又話唔會去,係呀,佢又係咁樣喇!不過我已經預咗,所以我反應都唔大嘅,叫佢冷靜下先,因為激動係唔會聽到我哋講咩,無謂浪費唇舌。而歷史話畀我哋知,只要我哋過到呢一刻,唔好同佢硬碰,一切都會變得美好!佢呢,好大機會係去完第一日就會同我講,佢好鍾意呀!做咗啲咩呀!同同學玩咗啲咩呀!所以,千祈唔好激動,要表現冷靜!!

佢入咗房5分鐘左右,我聽到老公入咗去同佢傾偈,叫大仔講出佢心中嘅擔憂。我明白,性格係天生,有啲人係天跌落嚟當被蓋,好似我同細佬就係,做咩要驚定先?但我亦諒解大仔的擔憂,不過,我哋真係好想盡量改善到,因為佢呢種性格,做人唔容易,特別是第時出嚟做嘢會辛苦,拍拖結婚,佢另一半都會辛苦。加上佢好難接受新事物,少少事就咁大反應,係對健康唔好,壓力係致病元兇,我希望我同爸爸可以教導佢點樣開解自己,點樣增強受壓能力。

 

呔媽專欄#231|如何對付擔心仔?

5分鐘的道理

不負所望地,我聽到爸爸響房同大仔傾偈,教佢要嘗試接受唔喜歡或突發之事,呢個其實對以後人生係非常重要!因為一生人,工作中,愛情親情朋友中,都會發生好多你唔鍾意嘅事情,而好多時,呢啲事情係你冇得選擇,逆來順受未必係壞事,可能原來果件事唔係你想像中咁差呢?又或者,你會從果件壞事入面又得到一啲好嘅事情呢?其實每日都係響我哋大人嘅生活入面發生緊。聽到爸爸同仔講,就好似返工咁,阿頭派你去做一個你極唔鍾意嘅job,但你唔可以reject㗎喎!咁係咪就要辭職唔做?但原來做咗之後,你有咗呢個經驗係可以令你有機會升職,咁你又會唔會後悔當初冇做?而好可能你做完之後,原來個job係好易做,只係你從來未接觸過,所以咁驚。爸爸又話,其實好多嘢都係頂硬上㗎!邊有得話驚就唔做,不過做完原來都唔驚嘅!啲嘢9成係自己嚇自己。

 

大仔聽完爸爸嘅說話,個心定咗,諗下其實又唔係咩大事,參加一個月,其實真正需要放學留響學校,只係爸爸接送果幾日,咁佢又話OK喇!唉,好想佢經歷多啲嘢,自己拍住心口,解決多啲問題,希望長大後唔會好似而家咁,樣樣嘢都擔心得咁緊要。我哋做父母會老,總有日會唔響度,希望自己可以盡量傳授多啲抗禦力畀兩個仔。凡事看開,輕鬆啲面對所有難題,其實過後諗番,以前經歷嘅只係人生中好細微嘅一部份,前面有大把開心事等住我哋㗎!!

advertisement