advertisement

移居美國20年,由讀高中開始同唔同種族嘅同學相處,到完成大學,當中又一直有工作。如果你問我,美國存唔存在種族歧視問題,咁係一定會有,但我幾慶幸自己落腳於三藩市,係個聯合國咁樣嘅大城市,基本上你諗到嘅種族都會響度生活,同鄉郊小鎮完全唔同。相信小鎮嘅欺凌歧視係嚴重好多,因為9成係當哋人,對其他國家文化嘅接受力一定較低,你要融入人哋地方生活,並唔容易。

呔媽專欄#232|海外升學揀啱地區,容易融入當地社區

海外升學 - 揀啱地區易適應

之前睇過一篇海外留學同學仔嘅文章,入面提到佢出國留學嘅苦況,畀人歧視,融入唔到,生活不便,建議大家去外國讀書要諗清楚。我認同佢所講的,因為我哋香港人慣咗一落街就shopping食嘢娛樂咩都有,外國地方,有時距離超市要半個鐘車程,來回一粒鐘。咁係咪真係唔好出國留學呢? 當然唔係啦,作為香港人,而我哋又咁喜愛方便嘅生活,我覺得只要安排仔女去大城市讀書,問題就已經解決了。

如果係美國的話,好似三藩市,洛杉機,紐約呢啲大城市,人種多,自己人多,生活方便,非常容易適應。至於學習英文,我覺得由中學讀到大學,再出來做嘢,基本上唔會衰得去邊,因為生活上你必須以英文溝通,講得多聽得多,熟能生巧。再講大城市嘅好處係,人種太多,大家講英文都好勁自己母語嘅口音,因此你唔會覺得尷尬,更能暢所欲言。當然如果你好想英文講到好native,亦大把途徑去學習同訓練。我反而認為,唔好專登去啲小鎮仔讀書諗住被迫講,英文會進步好多,好似該同學仔話齋,到時人哋唔理你,連講嘅機會都冇,勁冇癮。

 

 

海外升學 - 大城市較易融入當地文化

而響大城市生活,懂得尊重別人係非常重要的。好似我哋響香港長大10幾年,一直好少同其他文化嘅人接觸,有時見到啲自己未接觸過嘅嘢,會批評會反感,原因未必係因為果樣嘢唔好,只係自己未見過所以覺得古怪。要學習尊重人哋嘅文化其實唔難,只要你有顆謙卑嘅心,凡事以正面心態去觀察,就算你真係唔接受別人嘅文化,都唔好用自己把尺去胡亂批評,懂得互相尊重,就能更容易融入外國生活。