advertisement

自問本身性格最怕煩,一向做事爽快,所以由細到大朋友都當我係男仔咁對待。偏偏做人父母,就係一個10級煩氣嘅職務,日教夜教,日講夜講,我諗我呢世人重覆得最多說話嘅就係教兩個仔呢10年8年。有時我都忍唔住同啲仔講,我覺得自己係咁重覆啲嘢,講完又講,真係好難頂,我都覺得自己好煩,不如大家幫幫手記一記,見到啲嘢自動波做,免得我愈嚟愈長氣,大家舒服。

呔媽專欄#233|身教很重要!兒子主動幫人母感安慰

不過教仔就係咁啦,冇得你揀,邊有話講幾次就聽,好品行係要由細教到大,言教身教缺一不可。教仔最忌懶惰! 唔好以為講少一句,提少一句冇所謂,咩都由得佢,最後自己受番晒就梗㗎啦,最慘係社會上各界人士都會因為你唔教仔而受埋一份,佢老細、佢同事、佢朋友、佢拖友、佢配偶、佢啲細路,講真㗎喎!你見而家啲後生仔,完全唔顧人,唔會主動幫人,就已經對社會影響好大了,所以你畀心機教好啲仔女,係幾咁重要呢!

教仔多年,我哋開始有回報喇!上星期老公同兩個仔入戲院睇戲,大仔平時都戇居居嘅,果日周圍望,望到有兩個人捧住好大兜爆谷汽水,冇手開門,佢主動同爸爸講,果兩個人要幫手喎!之後就跑兩步去幫佢哋推住門,畀佢哋入。雖然呢個只係小小舉動,但對於平時好怕醜的大仔,都幾係鼓起勇氣的。響呢個大家都習慣視而不見嘅年代,唔好話想人會主動幫你,可能你求救人哋都借故閃開,所以「主動伸出援手」呢個教養,我覺得係我同老公用心教仔嘅成就嚟㗎!

呔媽專欄#233|身教很重要!兒子主動幫人母感安慰

 

 

其實身教呢樣嘢,老公做得好好嘅,佢每日放工返嚟就同兩個仔講當日發生啲咩事。因為佢響街上做嘢,會遇到好多突發性唔同嘅事情,佢會話畀啲仔聽,咁嘅情況爸爸會點做,同埋平時見到有人需要幫忙,第一時間就過去幫手。你付出嘅小小時間,可能幫了別人一個大忙。諗下如果老公唔係咁有心機,放工咁累都逐樣逐樣教小朋友,佢哋就唔會明白同學識咁多嘢,又冇咁知性懂事,知道點樣應付情況。

所以話,想教好小朋友就不能懶惰,冇得嫌煩,趁而家佢哋肯聽教就唔好放過任何機會,盡量灌輸,長大做個好人,我哋就功成身退了。