呔媽專欄#234|學懂放手,得着更多

網上我哋成日睇到啲人講笑咁話,媽媽愈懶,小朋友愈懂事,哈哈!其實某程度上係講得啱,當然唔係話要媽媽真係懶惰,咩都唔做唔理,但適當的放手,對小朋友絕對係好事。自從大仔同細仔接住出世,我可以話係冇停過,忙足10年。頭幾年眠乾睡濕真係冇氣唞,到佢哋返小學就好好多,但又因為我自己不甘只做全職媽媽,一路以來都趁佢哋睡後嘅少少私人時間工作,平衡番個心理,唔想咁快同社會脫節。到近幾年發展自己事業,開咗間手袋online shop,我差不多將自己推向崖邊,長期渴睡,日子過得非常充實,疲累但是愉快的。

呔媽學懂放手得着更多

大仔10歲細仔9歲,近排我心裡成日出現「功成身退」呢四個字。要身退當然仲有漫漫長路,但湊仔嘅方式真係隨住佢哋長大而改變了。而家湊佢哋,唔需要再係樣樣事出手,多以說話形式去跟手尾。我覺得係時候要放手了,其實10歲已經好大個,我做得太足,太保護,反而係害咗佢哋。佢哋要顧返自己啲野之餘,我仲會叫佢哋幫我做呢樣做果樣,訓練自理之餘,要照顧埋身邊人,特別是兩個都係仔,唔懶得,第時要好似爸爸咁,擔得起頭家。

 

呔媽專欄#234|學懂放手,得着更多

佢哋細個時,我同老公冇咩機會拍拖,因為自己全職湊嘅關係,去邊度都會帶埋對仔,都習慣了,亦好享受家庭生活。到近兩年覺得佢哋都真係大個仔,可以試下冇我哋響身邊嘅時候係點照顧自己,我哋兩公婆就開始安排一星期的日本拍拖旅行。原來小朋友,冇父母響身邊嘅時候係會有小宇宙的,哈哈!

呔媽專欄#234|學懂放手,得着更多

我哋去玩時,奶奶幫手照顧兩個仔,話佢哋咩都自己搞掂晒,一早起身食早餐,換衫返學,完全自動波。放學做功課呀,自己睇書,沖涼吹頭上床睡。同平時咩都扭我做,事無大小都媽咪媽咪,完全係精神分裂。我直情覺得係咪我阻住佢哋成長,我諗我應該去多啲旅行。身心疲累的戰友們,懂得於適當時候放手,放慢自己,係雙贏啊!

 

advertisement