advertisement

以前朋友話過我係一個天生湊仔婆,兩個仔好細個時,我已經常一拖二同佢哋四圍去,可能自己湊,兩個仔好聽話,我好少勞氣,我自己都貪玩,我哋嘅世界好快樂!亦試過自已帶住2、3歲嘅佢哋返香港幾個月,探朋友去玩,勁開心!我真係好鍾意湊小朋友,我覺得對住小朋友好開心,可以放低大人好複雜嘅世界,所有嘢都好純真好直接。而且我好鍾意說教,好喜歡響一張白紙上面畫畫嘅感覺,用幾多心機去教,就呈現返幾多響小朋友身上,而呢啲筆畫,全部係last forever,做父母教過小朋友嘅每句說話,令佢哋畢生受用。當然,其實努力湊仔教仔,最大得益除咗係小朋友,亦係我哋自己啦!佢哋生性懂事,我哋命都長幾年㗎!

呔媽專欄weak7講故汽水罐婆婆的故事

教小朋友有種樂趣,就係響唔同年紀,佢哋接觸唔同事物後,就會衍生唔同嘅思想,而我哋做父母的,就係要捉緊呢啲時機去教佢哋做人嘅道理。呢啲我睇得好重,因為你一hea過咗,佢哋個人生價值觀歪了,之後再講幾多都好難改變。就講兩個近排大細仔接觸到,會同我哋討論嘅話題,我覺得幾得意的。

 

1. 「需要」和「想要」背後的意義

大仔問,媽咪我哋可唔可以搭飛機返香港時,買First Class?或者 Business?睇到啲戲人哋可以攤響度睡覺,好似好舒服咁。我話頭等同商務嘅機票貴好多,平時買普通機票,每次4張已經用好多錢,我哋唔會想再畀更多嘅錢去買機票。大仔問,可唔可以自己儲錢搭?我教佢哋,搭一程飛機最多10幾個鐘,如果你有呢啲extra money,我會希望你用呢啲錢去做啲更有意義嘅事,或者捐去做善事幫人,你放棄呢個短暫享受,換到人哋可能醫番好對眼,可能有飽肚有溫暖。其實可以負擔到搭飛機去玩已經好好,我哋要識得分別需要(need)同想要(want)。奢侈嘅嘢,第時你哋努力工作,真係賺到錢,想獎勵自己係可以,但唔係響父母身上取,我哋只係普通家庭,你哋夠食夠着應該要滿足了。

 

2. 為何專買減價貨?

兩個仔開始大,加上呢邊冇校服,大家返學時會見到同學仔着啲咩,當然有人會着啲比較潮款同貴價嘅衫褲鞋,小朋友都會有比較的心態。仔有日問,爸爸我哋係咪唔會買正價嘢,我哋會買減價果啲嘢㗎? 因為我哋屋企,其實真係好少買正價嘢,前兩日先講開,我哋一係去outlet,一係online買on sale嘅嘢,就算去到店舖,我哋都慣咗一直向clearance果幾個架行去,減價冇嘢啱就話間嘢都冇嘢睇嘅!我同老公笑咗好耐,哈哈哈!一嚟美國呢邊啲嘢真係轉頭就減價,買正價其實幾戇居,二嚟我覺得個係人着衫,唔係衫着人,你個人本身有型,挺起個胸行路,唔好私私縮縮,唔好un腳,就咁一件白Tee一條sweatpants已經型到爆啦,使咩着貴衫㗎!之後老公講咗個故事比兩個仔聽⋯⋯

 

 

Weak 7講故:汽水罐婆婆的故事

呔媽專欄weak7講故汽水罐婆婆的故事

響一間coffee shop入面,有個幾靚嘅女仔飲緊咖啡,佢坐響落哋玻璃前望住街上嘅人行來行去,然後佢見到一個執汽水罐嘅婆婆,倒瀉咗一個裝滿罐嘅大布袋,罐跌到一哋都係。呢個時候有個望落好有型嘅年青人,佢衫褲鞋帽都係名牌,經過婆婆身邊望咗一眼,跨過哋上啲罐就行咗去。然後又有個衣着好普通嘅男仔,半跑趕前將哋下嘅罐逐個執番落袋,仲叫婆婆企埋一邊等,近馬路危險。老公問啲仔,如果你係個女仔,你會鍾意或者欣賞邊一個男仔? 着到成身名牌果個,定係幫老婆婆執嘢果個?

呔媽專欄weak7講故汽水罐婆婆的故事

2個仔異口同聲話,梗係幫婆婆果個啦!大仔諗一諗話,即係心地好重要過着得好睇?啱喇!就算一個人幾有錢,着到幾有型,佢冇kindness冇幫人嘅心,都係冇用。而如果你係一個好心哋嘅人,就算冇名牌衫褲,人哋睇到你嘅kindness,一樣會鍾意你,對你有好感。我哋着衫就係求舒服,最緊要乾淨整齊,男仔更唔需要太花巧。好嘅女仔係會睇你內涵性格,唔會只睇你外表。

 

每次聽住老公好用心咁教兩個仔,我覺得佢哋真係好幸福,會有啲鼻酸酸想喊。我爸爸響我好細個時已不在,我都好想有爸爸咁樣教我。多謝老公,希望佢兩個響我哋努力教育下,長大後會成為有用嘅人,亦希望佢哋會遇到欣賞佢哋嘅另一半,好似我咁欣賞你一樣。