呔媽專欄#240|人母的偽術

呔媽專欄240人母的偽術

響湊仔過程當中,佢哋不時會提醒番我好多做人嘅道理。有啲道理係我哋一向知道嘅,有啲就係我從佢哋身上學習嘅,相信有睇開我寫嘢嘅朋友,都領略唔少。今次又講一個我覺得幾值得分享嘅題目,呢個無論係我哋做人,或是教仔都好啱用,用得其所的話,唔止對小朋友好,連你同家人朋友嘅關係都會變得更好的。我所講嘅係,語言偽術。
我哋成日聽人講語言偽術呢個term,一聽就會覺得,即係講大話呃人啦!其實唔係。我諗大家都有睇過一啲文章,係建議你可以點樣用另一個positive嘅講法,去代替一啲傷人嘅說話。當你想發狂鬧啲仔女時,你先冷靜幾秒,嘗試收埋句惡言,用另一個方式去表達。好簡單一個例子,小朋友考試成績差,你一句鬧出口:「點解你咁蠢㗎? 呢題咁易都錯,咁都唔識!叫咗你點點點...」(而其實好多對我哋嚟講係易嘅嘢,對小朋友嚟講真係難㗎!) 咁你可以換個方式去講:「其實都考得幾好呀!都啱好多吖,係有幾題錯咗你要睇番點解錯,咁下次就會啱返㗎喇。」講真吖,試都考咗喇,齋埋怨係零建設性,反而你比佢知道,有人睇到佢嘅努力,鼓勵佢溫習番唔識果啲咪仲有意義。再講,你一句抹煞晒佢付出嘅時間心機,好又唔見你讚,衰咗又要畀你鬧,真係冇癮㗎喎!咁樣同仔女啲關係都唔好啦,有時自己唔覺,但呢啲放負嘅說話,其實好影響大家感情。

呔媽專欄240人母的偽術
又講多個幾得意嘅例子,前幾日收到email,話我兩個仔響12月份考嘅一個學區試(類似學能測驗),成績有少少低於水平,學區建議佢哋嚟緊讀一個為期一個月嘅summer program,等佢哋唔會話放完兩個月暑假,9月升班後追唔到進度。重點係,免學費,仲包早午餐小食。我睇到梗係雙眼發光啦,自己私報呢啲 summer prog.大約一千美金一位,而家兩個仔都免費,正呀!!我先諗緊,又帶佢哋返香港兩個月,好似hea得太過份,哈哈!咁我話畀大仔聽呢件事啦,我初時係講,學校offer呢個prog.因為佢想你summer繼續學習,要catch up番啲進度。佢一聽,即係話我讀得唔好,要catch up,冇得放暑假呀? 之後佢即刻話唔想join,個樣仲有啲唔開心。

佢呢個反應我有點突然,我冇諗到原來佢會介意自己係跟唔上進度嘅一群,我完全冇意識到佢會為呢樣嘢唔開心。我覺得自己好似太過坦白,可能有人會認為係正常吖,點解你要顧佢感受? 畀佢知道佢真係跟唔上都好㗎!佢係時候要面對呢啲 bala bala bala... 係!我唔反對要小朋友面對現實,但我嘅諗法會係,如果佢由而家我話畀佢聽佢跟唔上,要比學區特別「優待」去上summer class,我諗果種感覺會係好差,自信下降,同佢自願想增進自己,想畀心機學多啲嘢,完全兩回事。同一件事,正面感覺同負面感受係可以完全對立,你明唔明我講咩?個summer class佢哋就一定要讀㗎喇,但用一個咩心態去接受,你鍾意?你唔鍾意?我覺得好重要,sorry,我唔係果啲「我理得你鍾唔鍾意,總之你就係要做!」果種父母,啲仔嘅意願對我嚟講好重要。

 

 

然後我接住講,唔係進度差冇得放暑假,呢個係一個學區嘅schlors program,係一個schlorship reward(個email真係咁寫,我冇講大話㗎!都話啲外國人好偽善㗎啦,出封信唔會比hard feelings你㗎,唔係你轉頭又告佢話你個仔讀書唔掂,搞到你身心受創) 唔係人人有呢個機會㗎!點知大仔一聽到schlorship,即刻勁開心喎,猛問我佢做咗啲咩會有reward,會畀人選中咗有獎勵,係咪因為之前入咗籃球隊果啲?定係因為啱啱游水班升咗級?即刻講晒自己覺得叻嘅嘢嚟問。我話可能係啦,總之就正啦,上晝上堂,下午好多活動玩㗎!下年人哋都唔知仲選唔選你。之後佢話好呀想參加,好開心喎!一返到屋企,話畀細佬聽有呢件事,仲由頭講到尾,介紹晒個program有咩正嘢,又食又玩又有嘢學,真係畀佢笑死。之後老公問番,細佬聽到個反應係點,我話你個大仔咁好介紹,中頭獎咁,細佬梗係鍾意啦!
自問我平時講嘢都圓滑,唔會想令對方唔舒服,但經此一役,我覺得語言偽術原來真係咁重要㗎喎!大家不妨多用正面說話去表達,屋企氣氛一定會更融洽,更開心。

 

 

advertisement