advertisement

通常星期五朝早,我會返學校幫手,幫大仔老師做影印過膠等工作,預備嚟緊下星期嘅教材。大仔嘅成績一直中等,佢剛收到學期中成績表,最差都有2,多是2+同3(佢哋用1-3嚟 計,1係低於標準/2係邁向標準/3係達標或以上)。大仔好鍾意發夢,通常老師見到我,就會講兩句大仔近排上堂點樣,同同學傾計呀,唔專心呀之類,都係啲細路仔嘢。前兩日我幫完手講拜拜,老師陰陰嘴叫住我,話出去講兩句,仲叫埋大仔一齊出班房,我已經即刻掩住耳仔,又嚟 ? 我就嚟唔浦頭㗎喇,哈哈!

 

老師話唔係投訴佢,而係發現大仔回答老師問題時,態度唔係咁尊敬。佢舉咗幾個例子,比喻話你叫佢改正佢嘅功課,佢會答"OK","Yes!",又或者你未講完一樣嘢,講到一半,佢就會好快咁回應。老師想我響屋企訓練佢,回答大人嘅時候要企直,聽完人哋講嘢,再諗一諗先答。唔可以就咁答OK,要答 "Yes! Mrs.Ho.I will do this in a proper way.”(舉例)即係要成句講,稱呼埋對方名字,加回答人哋問你嘅問題或叫你做嘅事。老師又問我有冇發現佢平時響屋企有呢個問題,老老實實,我又真係冇深究呢樣嘢。響未知自己有冇問題之前,只好話間中都有啦,會跟老師嘅指示去改善佢。老師仲話,當佢改善後,習慣全句咁回答問題,會連佢嘅英文寫作技巧都會有進步。大仔呢個老師出名軍訓型,佢每次同我講嘢,我企得特別直㗎!

 

如果你問我呢,我平時真係唔覺啲仔有禮貌上嘅問題,相反,我一向幾滿意佢哋品德同家教。除咗基本禮貌,見面叫人,講唔該講多謝之外,佢哋亦從來唔會做出自私乞人憎行為,佢哋習慣禮讓,同佢哋相處過嘅朋友都幾鍾意佢哋,呢樣比成績優異更值得我開心。咁我係咪覺得老師話得佢唔啱呢?又唔係喎!所謂入鄉隨俗,我覺得個問題源於大家文化上有差異。而我當然好願意兩個仔去學習外國人嘅品行,因為佢哋大個都係響呢邊工作,都係同外國人共事,懂得尊重別人係好重要。

呔媽專欄239文化差異引伸的禮貌問題

點解我會話係文化差異?相信睇我寫嘢嘅大部份係香港人,我哋嘅香港文化就係快靚正!講嘢快、做嘢快、行步路都快過人。老實講住響美國廿幾年,我個人都仲係好港式。頂唔順收銀姐姐慢手慢腳,我會Whatsapp我老公爆氣,點解佢可以咁慢?點解咁簡單嘅嘢要用最複雜嘅方法去做?如果你哋同我一樣咁性急,真係唔好嚟長住,會激死。好喇,我想講啲仔係我一手湊大,我平時點回應人,好自然佢哋就係點樣回答。我同佢哋講啲咩,叫佢哋做啲咩,佢哋回我"OK!"、「可以!」、「冇問題!」我覺得好有禮貌呀,我自己有時都就咁「哦!」一聲就算。而其實就算佢哋「哦!」我都唔覺得係冇禮貌,哦嘅意思係知道,或者聽到咁解,佢唔係衰聲回應,冇問題喎!

 

如果要開始訓練佢哋,而我哋屋企又唔講英文,只講廣東話的話,其實件事都幾搞笑。變咗平時我叫佢哋洗衫咁啦,佢哋唔可以就咁話OK! 要答我:「知道喇媽咪,我會去洗衫㗎喇!」

呔媽專欄239文化差異引伸的禮貌問題

朋友問佢哋今晚過唔過去玩,又唔可以就咁答好呀!要答:「好呀Uncle Joseph,我今晚想去你度玩呀!」如果轉晒做英文對答,其實係好平常嘅答話。

呔媽專欄239文化差異引伸的禮貌問題

我哋平時睇西片,見到啲中文字幕,哇煩到呢,係嘅西西里太太,點點點樣,我個心就會:「快啲入正題啦,講咁多無謂嘢!」Sorry我真係咁樣,哈哈!所以其實可能都係我問題嚟 ,我好驚啲人拖長嚟講廢話。你一句明白,知道,然後啲嘢快手、妥當,好過你前前後後稱呼我,我諗呢啲真係香港同外國文化差異。

 

 

當然,我好感激大仔有呢個老師教佢嘅,所謂嚴師出高徒,人哋做咩想你個仔大方得體,談吐有禮?梗係愛啦,唔通責任咩!老師清楚外國人相處方式,嘅然佢有此意見,我都好應該配合,融入呢個西方文化,就開始同老公訓練佢哋,改善兩個仔啲對答吧!