呔媽專欄#245|一句說話,影響一生

呔媽專欄245一句說話影響一生

近日睇咗一篇報導,美國有個爸爸,佢仔讀二年級,大約7歲,有日佢仔帶咗份數學測驗返屋企,老師響上面用紅筆寫咗呢段comment: Absolutely pathetic.He answered 13 in 3 mins! Sad。(絕對地可悲。他用了3分鐘回答13條題目!不幸。)老師仲畫多個Sad Face公仔表示佢嘅不快。爸爸睇到呢個comment,覺得老師非常冇禮貌,同埋呢個回應實在令小朋友十分挫敗。佢選擇將呢件事公開於Facebook,絕大部份人對呢個老師嘅行為表示不滿,結果好多網民為佢哋聲討,仲好快響校區入面集合咗大約1,6000個簽名抗議,件事搞大咗,教育局派人調查,最後老師被學校辭退。

一句說話,影響學生一生

我支持呢個爸爸,我覺得身為老師,必須要對自己言行負責,因為你一句說話,可以影響學生一生!老師呢個職業,並唔應該係出份糧咁簡單,特別是幼稚園、中小學嘅老師,對住一班正在學習成長嘅大小朋友,更加係肩負住幫人教仔嘅責任,學生嘅言行舉止都會以你為模範榜樣,唔講得笑㗎!

呢位老師就係一個對學生非常唔負責任嘅例子。其實一個7歲小朋友只用咗3分鐘去做13題加減數,已經算幾好,即使佢用更多嘅時間,又或全部做錯晒,都唔應該承受老師呢種態度。教育重點係,只要佢有付出,盡力去做,已經值得讚許。做老師竟然睇唔到學生付出,只懂負面批評,唔識得點去幫助學生,反而大力踐踏佢嘅努力。一件咁簡單嘅事,大可以用鼓勵方式,正面啲講,希望佢下次可以完成更多題目,相信佢一定可以做到!之類嘢,唔係更有效益嗎?

但呢個老師選擇負評,仲驚個小朋友睇唔明佢寫咩,要手畫多個Sad Face比你知件事有幾Sad,完全係抹煞咗學生嘅努力。一個咁冇同理心嘅人,絕對冇資格教育下一代,其實最可悲嘅係個老師。

 

我自己成長中一啲比較深刻嘅說話,老師嘅教誨,大部份係讀緊小學或初中嘅時候學番黎。果個年紀嘅小朋友,除咗主要教導我哋嘅父母之外,相處得最長時間嘅就係老師。我哋所有嘢都係一知半解,老師講咩我哋聽咩,對唔肯定對錯嘅事物,我哋會希望老師比個正確答案,做功課如是,做人處事如是。記得大約四年級,有個英文老師好好人,成日畀班上好百厭幾個男同學激到紮紮跳。

 

「己所不欲,勿施於人」

有次佢語重深長咁教我哋,做人一定要將心比己,所謂「己所不欲,勿施於人」。意思係,你自己唔鍾意嘅事,唔好對別人做,你要學識照顧對方感受。然後呢30年來,我每做一件事,每個決定,甚至講句說話咁簡單,我都會諗下,我咁講我咁做,佢會唔會唔開心呢?如果調轉係我,我咩感覺呢?就係咁,我變成而家嘅我。每次諗到呢個老師,都想親口向佢講句多謝,為我身邊受惠嘅人都講句多謝,哈哈!遇到個好老師有心教好你,確係畢生受用。

advertisement