advertisement

呔媽專欄243是時候輕輕放手

今年Spring Break(即香港復活節假期)幫兩個仔報名參加社區舉辦嘅活動。我哋呢邊對於在學小朋友安排得好妥善,每逢放假,社區或校區都會舉辦活動,而個活動係朝8晚5,仲長過返學時間,我哋稱之為Camp。好似而家兩個仔參加咗為期5日嘅Spring Camp,暑假又會有Summer Camp。諗到點解?因為學校太多假期喇,在職父母不能時時請大假去湊仔,就會幫佢哋報呢啲班,大約200美金5日。

學校長假期對我嚟講冇咩影響,我都係響屋企做嘢,其實仲好,唔使咁早起身送佢哋返學。我從冇諗過要擺脫佢哋,即使大把方法。細個佢哋返幼稚園可以返全日,我半晝就接了,想有大半日自己湊番,自己教番佢哋。小學如是,有after school program佢哋可以留到6點,但我過去幾年都係3點接佢哋放學,返嚟自己教功課。係早幾個月因為同老公去旅行,先擺佢哋去after school program,方便奶奶唔使咁趕接佢哋,之後佢哋又幾鍾意,做埋功課先返嚟,就畀佢哋繼續去。我鍾意湊仔,日日對住都唔悶,好享受,但仔大喇,開始覺得自己都要放手,雖然懷念以前放長假,就帶住兩個仔去食Lunch,然後四圍逛,去公園去圖書館。

呔媽專欄243是時候輕輕放手

今次大細仔參加唔同Camp,大仔去Swim Camp,細仔去Basketball Camp。由於係社區搞,未必有自己識嘅同學,好多其他學校小朋友的,但我反而又幾鍾意咁樣,9歲10歲,係時候去接觸下外界。教咗咁多年待人接物,希望佢哋可以學習點樣同人相處,係個幾好經驗。佢哋以往一直行孖咇,做咩都兩個有伴,今次算係第一次冇人冇物,自己探索,我有啲戥佢哋緊張㗎!幸運兩個仔第一日返嚟都話好鍾意,玩得好開心,我就放心喇。我教佢哋最緊要係有禮貌,對人友善,唔好隨便挑剔,人哋就自然會鍾意同你玩,咁大家圍埋開開心心又一日啦!

 

呔媽專欄243是時候輕輕放手

個Camp 朝8晚5咁長時間,究竟做啲咩呢? 見佢哋個schedule上晝就warm up,玩game,教練教籃球/教游水,12-1pm Lunch,之後又再籃球比賽/自由游水,snack time,手工活動,4點半左右開始等接放。間中又會有特別活動,大仔今日就去咗個月fieldtrip 打保齡,佢話好開心!Last Day又有大食會,大家帶唔同食物Pot Luck(編按:每位參加者都準備食物互相分享的聚餐),感覺幾有趣。而呢幾日返嚟,兩個都開籠雀咁講果日發生咩事,有個小朋友叫咩名又做咗啲咩(多數講人哋百厭/駁咀果啲),自己又鍾意同邊個玩,原來人哋讀邊間學校之類。

我話佢哋知,如果小朋友係同你同級,好可能大家會入同一間Middle School㗎!佢哋又返去問個小朋友,好得意。總之成件事好多互動,好開心今次幫佢哋參加活動,感覺佢哋幾享受social life,係個好開始呀!