呔媽專欄 #247|#呔媽理財(上)小時愛花錢,老大徒傷悲

呔媽理財:小時愛花錢,老大徒傷悲

相信唔少人,年輕時都有過一段瘋狂Shopping,亂買嘢嘅日子,我都唔例外。讀書時每年返香港放暑假,每次都一袋二袋衫褲鞋飾品,再加一大堆無聊物,托返美國。小時候嘅我,真係一啲儲蓄概念都冇,我係錢來張手嘅人,只知用完,媽咪又會再畀,而我媽咪,從來冇教過我要儲蓄。

記得小學四年級開始,下午班嘅我,已經同同學出去食午飯,因此有飯錢又有小息零食錢。每日用剩嘅零錢,就會用嚟買晒雪糕零食返屋企,完全冇諗過可以儲起,因明天媽咪又會再畀錢食飯。中學時代會開始有儲錢概念,因為想剩錢,可以買Sanrio精品,我哋少女時代好鍾意啲得意嘢,公仔鏡梳,膠布,筆袋,貼紙,文具等等。當時所謂嘅儲錢並冇作用,都係果句,媽咪每個禮拜都會畀飯錢車錢,用晒又再會有。

呔媽理財:小時愛花錢,老大徒傷悲

真正開始儲蓄,我諗係我高中時代做 part-time,開始有額外收入,先有金錢概念。不過同好多年青人一樣,儲到啲錢又會忍唔住用咗佢,但比起細個係儲得耐咗多咗,同埋唔會全部用晒,叫做開始有Saving。

美國係個非常鍾意引你碌卡嘅國家,因為銀行好高利息,你最好冇錢還本,佢就係咁收息。我算係好自制嘅一群,從來唔欠卡數,又唔鍾意將啲嘢分期供,我覺得有錢就買,冇錢就算,唔會咩都供一餐。好似你分開24個月咁供,供款一定細,又會吸引到你買埋啲無謂嘢,好彩我冇呢舖癮。我一定要將呢個觀念教兩個仔,因我老公就係咩都買,咩都供一餐嘅人,我好努力去改變佢呢個思想。美國人大部份都有欠卡數債務,呢張卡還果張卡,又鍾意將啲嘢分期供,債務響美國嚟講其實好普遍。

有人覺得係必須,因為如期還款可以儲到Credit Score,信用良好對第時買車買屋借貸會有用。如期還就係,但成日還少少,或者只還息,反而會破壞信用分數,所以借錢時必須確定自己有錢還。

 

 

呔媽理財:小時愛花錢,老大徒傷悲

人到中年,又有兩個小朋友,相信好多同我一樣情況嘅朋友,都好痛恨自己點解唔一早儲蓄,因為有小朋友真係好多支出,仲未計要儲錢畀佢哋讀大學。如果早啲識儲錢、識投資,財政應該可以更鬆動,所以下一篇,我會講關於教小朋友理財,等佢哋從小有個概念,唔會好似我咁,細個洗腳唔抹腳。佢哋從小有金錢觀念,畢生受用,而我哋做父母又可以輕鬆少少,一舉兩得。

 

advertisement